اسلامی تحریک مزاحمت ۔ حماس کے ترجمان نے کہا ہے کہ غزہ میں گزشتہ کئی ہفتوں کی تیاری کے باوجود حماس مخالف مظاہرے کے انعقاد میں بری طرح ناکام ہونے کے بعد ثابت ہو گیا کہ فتح مکمل طور پر رسوا ہو چکی ہے اور عوام کو سڑک پر لانے پر قادر نہیں۔ حماس کے ترجمان ابوزھری نے ’’مرکز اطلاعات فلسطین‘‘ کے نمائندوں کو بتایا کہ ’’فتح‘‘ کی سر توڑ کوششوں کے باوجود غزہ میں حماس کے خلاف کوئی مظاہرہ نہ نکالا جا سکا۔ فیس بک پر متعدد پیجز، سرکاری ٹیلی ویژن چینل اور اس مقصد کے لیے بنائی گئی خصوصی ویب سائٹ پر بھرپور مہم چلانے کے باوجود کسی نے فتح کی کال پر کان تک نہیں دھرا اور اسے منہ کی کھانا پڑی ہے۔ ابوزھری نے کہا کہ فتح کی جانب سے دس افراد تک کا بھی کوئی مظاہرہ نہ نکالا جا سکا جس سے اس کی ناکامی اور لوگوں کو سڑکوں پر لانے کی قوت کا پول کھل گیا ہے۔ ساری فلسطینی قوم ’’فتح‘‘ کے مذموم مقاصد اور خطرناک ارادوں سے آگاہ ہو چکے ہیں اور اسے صرف فتنہ گر تنظیم قرار دے رہے ہیں۔ ابوزھری نے ’’مرکز اطلاعات فلسطین‘‘ سے خصوصی بات چیت کرتے ہوئے کہا کہ فتح کی جانب سے ایسی اوچھی حرکتوں کا مقصد مسئلہ فلسطین کو فتنے کا شکار کرنا اور اس ضمن میں اسرائیلی اہداف کو پایہ تکمیل تک پہنچانا ہے۔