فلسطینی وزارت برائے امور اسیران نے جنوب مشرقی غزہ میں تین فلسطینی نوجوانوں کے اغواء کے واقعہ کی شدید الفاظ میں مذمت کی ہے- وزارت کی طرف سے جاری کردہ بیان میں کہا گیا ہے کہ تینوں نوجوانوں کی زندگی کی ذمہ دار اسرائیلی حکومت ہے- فلسطینی وزارت برائے امور اسیران کے ڈائریکٹر ریاض اشقر نے کہا کہ گزشتہ روز غزہ کے سرحدی علاقے میں اسرائیلی فوج نے پرندوں کا شکار کرنے والے فلسطینیوں کے ایک گروپ پر فائرنگ کی جس سے ایک شکاری شہید اور متعدد زخمی ہو گئے، زخمیوں کو ہسپتال منتقل کر دیا گیا ہے- اسرائیلی فوجی اہلکاروں نے فائرنگ کے دوران تین فلسطینی نوجوانوں کو اغواء بھی کیا- ریاض اشقر کا کہنا تھا کہ اسرائیلی فوج نے فلسطینی نوجوانوں پر سرحدی باڑ کے نزدیک آنے کے بہانے سے فائرنگ کی حالانکہ وہ غزہ کے علاقے میں پرندوں کا شکار کر رہے تھے- فلسطینی شہریوں پر فائرنگ اور انہیں گرفتار کرنا اسرائیلی فوج کا وطیرہ بن چکا ہے اسرائیلی فوج شہریوں کے خلاف مسلسل جارحانہ کارروائیاں کر رہی ہے- گزشتہ ہفتوں میں اسرائیلی فوج کی شہریوں کو اغوا کرنے کی مہم تیز ہوگئی ہے- ریا ض اشقر نے مغوی فلسطینی نوجوانوں کی زندگیاں بچانے کیلئے عالمی ادارے ریڈ کراس سے مداخلت کا مطالبہ کیا ہے- انہوں نے کہا کہ ریڈ کراس کو چاہیے کہ وہ فلسطینی نوجوانوں کا پتہ چلائے کہ انہیں کہاں رکھا گیا ہے اور وہ کس حال میں ہیں ، کیونکہ وہ زخمی ہیں اور انہیں فوراً علاج کی ضرورت ہے-
