اسرائیلی فوج نے عسکری نوعیت کی معلومات کا افشا روکنے کے لیے اپنے اہلکاروں کو سماجی رابطوں کی ویب سائٹس بالخصوص فیس بک کے استعمال سے روک دیا ہے۔ اسرائیل کے کثیر الاشاعت روزنامے ’’یدیعوت احرونوت‘‘ نے جمعہ کے روز شائع کردہ خبر میں بتایا کہ حالیہ اقدام صہیونی فوج کی جانب سے خفیہ معلومات کی چوری روکنے کے بڑے منصوبے کا ایک حصہ ہے۔ اخبار نے اسرائیلی عسکری مجلے ’’بمحنی‘‘ کے حوالے سے بتایا کہ پہلے اسرائیلی فوجی ہر طرح کی ویب سائٹ کھول سکتے تھے جس سے معلومات کی لیک ہونے کے خدشات موجود تھے تاہم اب نئے منصوبے کے تحت فوجی اڈوں میں تمام ویب سائٹس فلٹریشن کے بعد کھولی جا سکیں گی۔ صہیونی فوج کی جانب سے یہ منصوبہ سکیورٹی معلومات تک ذرائع ابلاغ کی رسائی اور اس کے افشاء کے بعد آئندہ ایسے واقعات سے بچنے کے لیے بنایا گیا ہے۔