مقبوضہ فلسطین کے علاقے سلوان میں اسرائیلی فوج اور فلسطینی نوجوانوں کے مابین تازہ جھڑپوں میں دو بچوں سمیت القدس کے پانچ شہری زخمی ہو گئے ہیں۔ گزشتہ چند روز سے مغربی کنارے، القدس اور غزہ کی پٹی کے فلسطینی علاقوں میں صہیونی کارروائیاں تیز ہونے سے علاقے کے حالات کشیدہ ہوتے جا رہے ہیں۔ جمعہ کی صبح سے مشرقی القدس کے مختلف علاقوں میں اسرائیلی قابض فورسز کی شروع ہونے والی کارروائیاں اتوار کی رات بھی جاری رہیں، رات گئے اسرائیلی پولیس اور سرحدی گارڈز نے علاقے پر حملہ کیا جس پر مشتعل فلسطینی نوجوانوں نے احتجاج شروع کر دیا جو جھڑپ کی صورت اختیار کر گیا۔ اسرائیلی فوج نے مظاہرین کو منتشر کرنے کے لیے اشک آور گیس کا بے دریغ استعمال کرنے کے ساتھ ان پر دھاتی گولیوں کی بوچھاڑ بھی کردی۔ مقامی ذرائع نے بتایا کہ وادی حلوہ، بستان میں بھی جھڑپیں ہوتی رہیں، اس طرح ان جھڑپوں میں کم از کم پانچ فلسطینی زخمی جبکہ درجنوں دم گھٹنے سے سخت اذیت کا شکار رہے۔ وادی حلوہ کے انفارمیشن سنٹر کے مطابق زخمیوں میں دس سال سے کم عمر کے دو بچے بھی شامل ہیں جنہیں علاج کے لیے ہسپتال منتقل کر دیا گیا ہے۔