قاھرہ حکام نے غزہ اور مصر کے مابین رفح کراسنگ کو مصر کی جانب جانے کے لیے بھی کھول دیا ہے اس سے قبل مصر میں پھنسے فلسطینیوں کو غزہ بھیجنے کے لیے کراسنگ کھولی گئی تھی۔ تین ہفتوں کی بندش کے بعد مصر جانے کی اجازت کے بعد اہل غزہ میں خوشی کی لہر دوڑ گئی ہے۔ مصر میں عوامی تحریک کے بعد اس ماہ کے آغاز میں رفح کراسنگ کو بند کر دیا گیا تھا، گزشتہ جمعہ کو اسے مصر سے غزہ آنے والوں کے لیے کھولا گیا جبکہ اب تین روز کے لیے دونوں اطراف آمد و رفت کی اجازت دے دی گئی ہے۔ فلسطینی ذرائع کے مطابق کہ منگل کی صبح کراسنگ کھولے جانے کے بعد بسوں نے مصر کی جانب جانا شروع کردیا ہے۔ تاہم مصری حکام کی جانب سے مصر آنے کی محدود اجازت دی گئی ہے اور مریضوں، طلبہ اور مصر میں رہائش اور ویزوں کی درخواست دینے والوں پر مشتمل 300 افراد ہر روز مصر جاسکیں گے۔ واضح رہے کہ گزشتہ چند ایام میں رفح کراسنگ کے ذریعے مصر جانے کی درخواست دینے والے فلسطینیوں کی تعداد تین ہزار سے تجاوز کر گئی ہے۔