مغربی کنارے میں فتح کی مستعفی حکومت کے وزیراعظم سلام فیاض نے امریکا کی جانب سے امداد بند کرنے کی دھمکی پر نہایت بزدلانہ اور چاپلوسی پر مبنی ردعمل کا اظہار کیا ہے. مرکزاطلاعات فلسطین کے مطابق اتوار کو جنین میں ایک نیوز کانفرنس سے خطاب کرتے ہوئے سلام فیاض نے کہا کہ انہیں امریکا کی طرف سے اسرائیل کی مذمت میں قرارداد لانے پر امداد بند کرنے کی دھمکی پر افسوس ہے. انہوں نے صدر براک اوباما سے اپیل کی کہ وہ فلسطینی اتھارٹی کی امداد بند نہ کرے بلکہ اس میں اضافہ کرے. ایک سوال کے جواب میں سلام فیاض کا کہنا تھا کہ انہیں یہ توقع نہیں کہ امریکا محض اسرائیل کی مخالفت کی پاداش میں فلسطینیوں کو قانونی امداد سے محروم کرے گا. لیکن پھر بھی اگرامریکا نے ایسا کیا تو یہ افسوسناک ہو گا. سلام فیاض کا کہنا تھا کہ موجودہ حالات میں فلسطینیوں کو امداد کی ضرورت نہ کہ پہلے سے جاری امداد بند کرنے کی گنجائش ہے. خیال رہے کہ سلام فیاض نے یہ موقف ایک ایسے وقت میں اپنایا ہےامریکا نے دھمکی دی ہے کہ اگر فلسطینیوں نے سلامتی کونسل میں اسرائیل کی مذمت میں قرارداد لانے پر اصرار جاری رکھا ان کی امداد بند کر دی جائے گی.