اقوام متحدہ کی کمیشنر برائےانسانی حقوق نافی بیلائی نے کہا ہے کہ اسرائیل اپنے زیرانتظام علاقوں میں فلسطینیوں کے حقوق کو غصب کر رہا ہے اور فلسطینیوں کےخلاف جاری مظالم کو منظرعام آنے سے روک رہا ہے. فلسطین کےمقبوضہ علاقوں کا دورہ کرنے کے بعد بیت المقدس میں ایک نیوز کانفرنس سے خطاب کرتے ہوئے مسز بیلائی نے کہا کہ اسرائیل فلسطینیوں کے خلاف امتیازی سلوک روا رکھے ہوئے ہے بالخصوص مقبوضہ فلسطینی علاقوں اور غزہ کی پٹی میں شہری اسرائیل کے مسلط کردہ ظالمانہ اقدامات کا شکار ہیں. اقوام متحدہ کی خاتون اہلکار کا کہنا تھا انہیں فلسطینی علاقوں میں اسرائیل کے ہاتھوں شہریوں کو درپیش مسائل پر سخت تشویش ہے کیونکہ عالمی اداروں کی جانب سے باربار منع کرنے کے باوجود اسرائیل انسانی حقوق کی خلاف ورزیوں سے باز نہیں آ رہا. ایک سوال کے جواب میں اقوام متحدہ کی اہلکار نے کہا کہ فلسطینی علاقوں میں یہودی بستیوں کی تعمیر اور نسلی دیوار کی تعمیر کے باعث شہریوں کو شدید مشکلات کا سامنا ہے. مغربی کنارے میں اسرائیل کی تعمیر کردہ دیوار سے فلسطینی آبادیاں دیوار کے دونوں اطراف میں تقسیم ہو کر رہ گئی ہیں. ایک دوسرے سوال کے جواب میں بیلائی نے کہا کہ میں سیاست کی بات نہیں کرتی بلکہ میں عالمی قانون کی رو سے معاملات کو دیکھ رہی ہوں. فلسطینی علاقوں میں اسرائیل کے بیشتر اقدامات صرف یہودیوں کے تحفظ کے لیے ہیں فلسطینیوں کو ان کے بنیادی اور اساسی حقوق سے بھی محروم کیا جا رہا ہے. انہوں نے عالمی برادری سے مطالبہ کیا کہ وہ فلسطینی علاقوں میں جاری اسرائیلی سرگرمیوں کی روک تھام کے لیے تل ابیب پر دباٶ ڈالے.