محاصرہ زدہ غزہ میں اسرائیلی بمباری سے گودام کی تباہی کے بعد ادویات کا بحران شدت اختیار کر گیا۔ فلسطینی وزیر صحت باسم نعیم نے تباہ شدہ گودام میں نیوز کانفرنس سے خطاب کرتے ہوئے بتایا کہ غزہ کو پہلے ہی ادویات کی کمی کا سامنا ہے جبکہ اسرائیلی بمباری سے بڑے پیمانے پر ادویات تباہ ہو گئی ہیں، جس سے بحران مزید شدت اختیار کر گیا ہے ۔ وزیر صحت کا کہنا تھا کہ ادویات کی کمی کے باعث ہسپتالوں کا نظام بری طرح متاثر ہوا ہے ۔ اس گودام میں عالمی ادارہ صحت، ریڈ کراس اور دیگر عالمی امدادی اداروں کی ادویات رکھی گئی تھیں ۔انہوں نے کہا کہ اس بمباری کہ وجہ رام اللہ وزارت صحت کی جانب سے حماس پر ادویات کو خفیہ گوداموں میں رکھنےسے متعلق من گھڑت الزامات ہیں ۔ باسم نعیم نے انسانی حقوق اور صحت کے عالمی امدادی اداروں سے غزہ میں ادویات اور دیگر طبی سامان کی کمی دور کرنے کے لئے فوری طور پر مداخلت کی درخواست کی ۔