غزہ کی ناکہ بندی کے خاتمے کے لیے کوشاں یورپی مہم نے مصری حکومت سے مطالبہ کیا ہے کہ وہ غزہ کے لئے یورپی امدادی قافلے کے لیے سہولتیں فراہم کرے اور قافلے کو بور سعید بندرگاہ کے ذریعے غزہ تک پہنچانے کے اقدامات کرے- امدادی قافلہ 110 کنٹینرز اور ٹرکوں پر مشتمل ہے – جس میں طبی سامان ، غزہ کے بچوں کے لیے ضروری اشیاء اور سینکڑوں وہیل چیئرز ہیں- ’’ یورپی مہم برائے انسداد ناکہ بندی‘‘ غزہ کی طرف سے جاری بیان میں کہا گیا ہے کہ غزہ میں حالات بہت کٹھن ہیں- مصری حکام کو ایسے فیصلے کرنے چاہئیں جو ذمہ داریوں اور انسانی فرائض کے مناسب ہوں- غزہ کو اس وقت اس طرح کی امداد کی اشد ضرورت ہے- مصری قیادت کو ہر اس اقدام کے ساتھ مثبت رویہ اپنانا چاہیے جو غزہ کی ناکہ بندی کے خاتمے کے لیے کیا جا رہا ہو- بالخصوص طبی اور انسانی ضروریات اشیاء کو غزہ پہنچانے والوں کے لیے سہولتیں فراہم کی جائیں- یورپی مہم نے سینکڑوں مرتبہ مصری صدر حسنی مبارک سے مطالبہ کیا ہے کہ غزہ کو بچانے کے لیے مصر اور غزہ کے درمیان رفح سرحد کو کھولا جائے –
