مشرقی غزہ میں اسرائیلی فائرنگ سے تین فلسطینی زخمی

فلسطین سے موصولہ اطلاعات میں بتایا گیا ہے کہ بدھ کے روز مشرقی غزہ میں نکالی جانے والی پرامن ریلی پر قابض اسرائیلی فوج کی فائرنگ سے تین فلسطینی شہری زخمی ہو گئے۔ یہ ریلی علاقے میں نام نہاد ‘بفر زون’ کی تعمیر کے خلاف نماز ظہر کے بعد نکالی گئی۔

وزارت صحت میں ڈائریکٹر شعبہ حادثات و ایمبولینس ڈاکٹر معاویہ حسنین نے کہا ہے کہ امدادی کارکنوں نے تین زخمیوں کو ’’شفاء ہسپتال‘‘ منتقل کیا ہے جنہیں جسم کے مختلف حصوں پر گولیوں کے زخم آئے۔

ایک ایسی ہی دوسری کارروائی میں 5 اسرائیلی فوجی گاڑیوں نے 6 بلڈوزروں کی معیت میں بدھ کی صبح غزہ کی پٹی کے وسطی علاقے مشرقی البریج کیمپ میں محدود پیمانے پر دراندازی کا ارتکاب کیا۔ اسرائیل فوجی مشرقی کیمپ کے السرحی گیٹ سے دو سو میٹر اندر تک گھس آئے۔ فوج کی معیت میں دراندازی کا ارتکاب کرنے والے بلڈوزروں نے زرعی اراضی میں کھدائی شروع کر دی۔ فوج نے شہریوں کے ہاتھوں لگائے جانے والے زیتون کے درختوں میں بڑے پیمانے پر تلاش آپریشن بھی کیا۔

اسرائیلی فوج وقفے وقفے سے فلسطینیوں کے گھروں اور زرعی اراضی کی جانب اندھا دھند فائرنک کر رہی ہے۔ اس فائرنگ سے جاں بحق و زخمی ہونے والے فلسطینیوں کے بارے میں کوئی اطلاع سامنے نہیں آ سکی ۔ یاد رہے کہ منگل کے روز مشرقی کیمپ میں دراندازی کا ارتکاب کرنے والی اسرائیل فوج کی فائرنگ سے دو فلسطینی مزاحمت کار شہید ہوئے ہیں۔