دائیں بازو کی صہیونی جماعتوں نے مسجد اقصیٰ کو شہید کر کے اس کی جگہ نام نہاد ھیکل سلیمانی کی تعمیر کی مہم شروع کی ہے، جس کا عنوان ہے ”ہمارے زمانے میں فوری ھیکل سلیمانی کی تعمیر کی جائے”
صہیونی ویب سائٹ کے مطابق ”اسرائیل ہماری زمین” نامی یہودی تنظیم نے بسوں پر نام نہاد ھیکل سلیمانی کی مجوزہ تصویروں کے بڑے بڑے پوسٹر لگانے کی مہم شروع کی ہے۔
اس مہم کے ذریعے بیت المقدس میں ”ایجد کمپنی” کی دو سو بسوں پر نام نہاد ھیکل سلیمانی کی مجوزہ تصویروں کے پوسٹر لگائے جارہے ہیں۔ یہ بسیں بیت المقدس کے تمام روٹس پر چلتی ہیں۔
اسلامی اوقاف اور ورثے کے ادارے اقصیٰ فاؤنڈیشن نے اس مہم کے خطرات سے متنبہ کیا ہے۔ اقصیٰ فاؤنڈیشن کی طرف سے جاری بیان میں کہا گیا ہے کہ یہ مہم مسجد اقصیٰ کے خلاف صہیونی جنون کی انتہاء ہے۔ صہیونی جماعتوں نے ایسے وقت میں یہ مہم شروع کی ہے جب مقبوضہ بیت المقدس کو یہودیانے کی سازشیں عروج پر ہیں۔ اس کا مطلب ہے کہ مسجد اقصیٰ اور بیت المقدس دونوں صہیونیوں کے نشانے پر ہیں۔