مقبوضہ مغربی کنارے میں بلعین کے مقام پر فلسطینیوں کے نسلی دیوار اور یہودی آبادکاری کے خلاف جاری ہفتہ وار احتجاجی مظاہرے کے دوران صہیونی فوج نے مظاہرین پر وحشیانہ تشدد کیا ہے جس کے نتیجے میں درجنوں افراد کے زخمی ہونے کی اطلاعات ہیں.
مرکز اطلاعات فلسطین کے ذرائع کے مطابق فلسطینی شہریوں نے نماز جمعہ کے بعد بلعین میں جمع ہو کر اسرائیلی فوج کے خلاف نعرے بازی شروع کی. مظاہرین کو منتشر کرنے کے لیے قابض صہیونی فوج اور پولیس کی اضافی نفری تعینات کی گئی تھی.
فلسطینی ذرائع کے مطابق مظاہرین میں مقامی شہریوں کےعلاوہ غیر ملکی انسانی حقوق کے رضاکار بھی شریک تھے. اس موقع پر قابض صہیونی فوج اور پولیس نے مظاہرین کو منتشر کرنے کے لیے ان پر لاٹھی چارج کیا، آنسوگیس کے شیل پھینکے اور ربڑ کی گولیاں چلائیں. جس کے نتیجے میں درجنوں افراد زخمی ہوئے ہیں.
زخمیوں کو رام اللہ کے مختلف اسپتالوں میں لے جایا گیا ہے. خیال رہے کہ رام اللہ کے مغرب میں بعلین اور نعلین کے مقامات پر اسرائیل نے یہودی کالونیوں کے تحفظ کی آڑ میں دیوار تعمیر کر رکھی جس سے فلسطینیوں کےلیے مشکلات میں اضافہ ہو گیا ہے. فلسطینی گذشتہ دو سال سے اس علاقے میں دیوار اور یہودی بستیوں کی تعمیر کےخلاف احتجاج کرتے رہے ہیں اورہر بار صہیونی حکام فلسطینیوں کے احتجاج کو طاقت کے زور پر کچل دیتے ہیں.