مغربی کنارے کے شہر الخلیل میں غاصب مسلح یہودیوں نے فلسطینیوں کی زرعی اراضی پر متعدد حملے کیے اور درجنوں ایکٹر کھڑی فصلیں تباہ کر دیں۔ الخلیل کے مشرقی علاقے ’’بویرہ‘‘ میں درختوں اور فصلوں کو نذر آتش کرنے والے صہیونیوں کو اسرائیلی فوج نے بھرپور مدد فراہم کی۔ یہودی آباد کاری کے خلاف کام کرنے والے مقامی ذرائع نے ’’مرکز اطلاعات فلسطین‘‘ کو صہیونی جارحیت کی تفصیلات سے آگاہ کرتے ہوئے کہا کہ اسلحہ سے لیس انتہا پسند یہودیوں نے رات گئے سلطان خاندان سے تعلق رکھنے والے گھرانے کی زرعی اراضی پر دھاوا بولا اور فصلوں کو اکھاڑنا شروع کر دیا جس پر خاندان کے افراد نے ان پر قابو پانے کے لیے کالونی کے رہائشیوں کو مدد کے لیے پکارا۔ تاہم موقع پر موجود اسرائیلی فوج کے اہلکاروں نے اہل علاقہ کو غاصب یہودیوں کے قریب آنے جانے سے روک دیا اور یہودیوں نے اپنی انتہا پسندانہ کارروائی جاری رکھی جس میں بڑے پیمانے پر فصلوں اور درختوں کو نقصان پہنچا بالخصوص زیتون اور انگور کے کئی درخت اکھاڑ پھینکے گئے۔ اسی دوران غاصبوں نے زرعی اراضی کو آگ بھی لگا دی جس کی وجہ سے دعنا اور جابر گھرانوں کی درجنوں ایکڑ اراضی پر کھڑی فصلیں اور انگور کے درخت جل گئے۔ تاہم کسی کے زخمی ہونے کی اطلاع موصول نہیں ہوئی۔ واضح رہے کہ ’’بویرہ‘‘ کے علاقے پر صہیونی یہودیوں کی جارحانہ کارروائیاں آئے روز کا معمول بن چکی ہیں، اسرائیلی فوج کی مدد سے یہ یہودی اب تک بڑے پیمانے پر اہل علاقہ کی اراضی اور مملوکہ اشیا کو نقصان پہنچا چکے ہیں۔