اسرائیلی فوج نے مقبوضہ بیت المقدس کے علاقے عیسیویہ پر دھاوا بول کر اندھا دھند فائرنگ کی، فوج نے اہل علاقہ کے گھروں پر زہریلی گیس کے شیل بھی برسائے، اہل علاقہ کی جوابی کارروائی پر علاقہ میدان جنگ بن گیا، موصولہ اطلاعات کے مطابق اسرائیل کے تین فوجی زخمی ہو گئے۔ اسرائیلی فوج کی جارحانہ کارروائی کے دوران فوج ہیلی کاپٹر بھی علاقہ پر گردش کرتے رہے۔ عیسویہ کے نوجوانوں نے شدید ردعمل کا مظاہرہ کیا، جھڑپوں کے دوران اسرائیلی فوج نے بڑے پیمانے پر فائرنگ کی، تاہم اہل علاقہ میں سے کسی کے زخمی ہونے کی اطلاع موصول نہیں ہوئی۔ تاہم عینی شاہدین کے مطابق جھڑپوں کے دوران تین اسرائیلی فوجی گھات لگا کر بیٹھے عیسویہ کے نوجوانوں کا شکار ہو گئے۔