فلسطینی وزیر اعظم کے سیاسی مشیر ڈاکٹر یوسف رزقا نے کہا ہے کہ امریکی نمائندے جارج مچل کے دورہ مشرق وسطیٰ سے خطے میں کوئی تبدیلی نہیں آئیگی اور نہ ہی فلسطینیوں کو اس دورے سے کوئی فائدہ ملنے کی امید ہے۔ پریس کے نام جاری اپنے بیان میں ڈاکٹر یوسف رزقا نے کہا کہ سرحدی یا سلامتی معاملات پر کسی بریک تھرو کا امکان نہیں ہے۔ انہوں نے اسرائیل پر الزام عائد کیا کہ وہ ایک منصوبہ بندی کے تحت مقبوضہ بیت المقدس کو یہودیانے کی سازشوں میں مصروف ہے۔ انہوں نے خبردار کیا کہ مقبوضہ بیت المقدس اس وقت شدید خطرات سے دوچار ہے۔ وزیر اعظم کے مشیر نے کہا کہ عباس انتظامیہ مذاکرات کے نام پر اسرائیل کے جرائم پر پردہ ڈالنے کی کوششوں کا حصہ دار بنتی جا رہی ہے ۔انہوں نے عباس انتظامیہ سے اپیل کی کہ وہ بے مقصد بات چیت سے اپنے کو الگ کریں۔ انہوں نے عرب حکومتوں سے بھی اپیل کی کہ وہ اپنے فیصلے پر نظر ثانی کر کے ،بے مقصد مذاکرات کی حمایت ترک کریں۔