اسلامی تحریک مزاحمت (حماس) کا ایک اعلیٰ سطح کا وفد فتح سمیت دیگر فلسطینی جماعتوں سے مفاہمت کی بات چیت کے سلسلے قاہرہ پہنچ گیا ہے، وفد کی قیادت حماس کے سیاسی شعبے کے نائب صدر ڈاکٹر موسیٰ ابو مرزوق کررہے ہیں جبکہ وفد میں سیاسی شعبے کے رکن محمد نصر بھی شامل ہیں۔ وفد کی دمشق سے روانگی کے بعد حماس کے ترجمان ڈاکٹر سامی ابو زھری نے بتایا کہ حماس کے راہنما ابتدائی طور پرقاہرہ میں مصری حکام سے بات چیت کریں گے اور فتح سے مذاکرات کا ایجنڈا طے کرنے کے ساتھ بات چیت کی تاریخ کا بھی تعین کریں گے۔ انہوں نے کہا کہ مذکرات کے اس ساتویں دور میں حماس کا وفد کھلے دل سے دیگر جماعتوں سے بات چیت کرے گا۔ تاکہ ملک مین انتشار کی فضا کا خاتمہ کرکے حالات کو صحیح دھارے پرلایا جاسکے۔ ابو زھری نے کہا کہ صدر محمود عباس اور فلسطینی اتھارٹی کی جانب سے گولڈ سٹون کی رپورٹ پر بحث میں تاخیر کرانے کے بعد مفاہمت کے لیے فضا سازگار نہیں رہی تاہم حماس کی کوشش ہوگی کہ بات چیت کو موثر اور نتیجہ خیز بنایا جاسکے۔ ترجمان کا کہنا تھا کہ فلسطینی اتھارٹی کا حالیہ رویہ مفاہمت کی کامیابی میں رکاوٹ ثابت ہو سکتا ہے، فتح سمیت مفاہمتی عمل میں شامل تمام دھڑوں کوباہمی اعتماد کی فضا پیدا کرنا ہوگی۔
