ترک وزیراعظم رجب طیب ایردوان نے ایک بار پھر فلسطینی شہریوں با لخصوص غزہ کے محاصرہ زدہ شہریوں کی ہرممکن مدد جاری رکھنے کے عزم کا اعادہ کیا ہے. ان کا کہنا ہے کہ وہ غزہ کے بچوں کو بھوک ،غربت اور افلاس میں نہیں دیکھ سکتے،جہاں تک ہو سکا ان کے حقوق کی جنگ لڑتے رہیں گے. مرکز اطلاعات فلسطین کے مطابق ترک وزیراعظم نے ان خیالات کا اظہار بدھ کے روز استنبول میں تاجروں اور صنعت کاروں کی آزاد تنظیم” الموصیاد” کی طرف سے تجارتی نمائش کے افتتاح پر خطاب کے دوران کیا. انہوں نے کہا کہ فلسطینی بچوں کے ساتھ ہونے والی زیادتیوں پر خاموش تماشائی بن کر اور ہاتھ باندھ کر نہیں بیٹھ سکتے. انہیں انصاف فراہم کرنےکےلیے ترکی ہرسطح پر کوششں جاری رکھے گا. طیب ایردوان نے کہا کہ غزہ میں ناکہ بندی کا شکار بچوں اور پاکستان میں سیلاب سے متاثرہ بچوں کی مشکلات ایک جیسی ہیں. ترکی ان کی ہرممکن مدد جاری رکھے گا. ترک وزیراعظم نے کہا کہ انہوں نے ماضی میں بھی فلسطینی عوام کی بہبود کے لیے کام کیا ہے آئندہ بھی ان کی مدد سے پشت نہیں پھیریں گے. انہوں عالمی برادری بالخصوص عالم اسلام سے مطالبہ کیا کہ وہ بھی محصورین غزہ اور پاکستان میں حالیہ سیلاب سے ہونے والی تباہی میں ان کی مدد کے لیے مزید امداد فراہم کریں.