(روزنامہ قدس ۔آن لائن خبر رساں ادارہ) صائب عریقات کا کہنا ہے کہ غرب اردن کے شہروں میں قائم کی گئی سیکڑوں یہودی کالونیوں کو اسرائیل کا باقاعدہ حصہ تسلیم کرنے کے بعد بچ جانےوالے فلسطینی علاقوں پر مشتمل اگر فلسطینی ریاست کا قیام عمل میں لایا جاتا ہے تو اس کے نتیجے میں آزاد اور خود مختار فلسطینی ریاست کے قیام کا خواب ہمیشہ کے لیے دفن ہوجائےگا۔
فلسطین لبریشن آرگنائزیشن کی ایگزیکٹو کمیٹی کے سیکریٹری جنرل اور فلسطینی انتظامیہ کے مذاکراتی امور کے سربراہ صائب عريقات نے اسرائیل کی جانب سے غرب اردن کے علاقوں کو اسرئیل میں ضم کرنے کے بیان کی شدید الفاظ میں مذمت کرتے ہوئے کہا ہے کہ غرب اردن کا اسرائیل کے ساتھ الحاق تاریخ کی سنگین ترین غلطیوں میں سے ایک ہوگی۔
انھوں نے کہا کہ اس غیر قانونی اقدام سے اسرائیل اور فلسطینی اتھارٹی کے درمیان 27 سال سے جاری مذاکرات کے تمام نتائج صفر ہوجائیں گے اور بغیر کسی نتیجے کے مذاکرات کا ڈرامہ فلاپ ہوجائے گا جوخطے کے استحکام کیلئے بڑا خطرہ ہے ۔