یہودی انتہا پسندوں کا ربیوں اور صہیونی فوجیوں کی معیت میں قبلہ اول پردھاوا

مسجد اقصیٰ پر یہودی آباد کاروں کے دھاوں اور مقدس مقام میں داخل ہو کر اس کی مبینہ بے حرمتی کے ارتکاب کا مکروہ عمل بدستور جاری ہے۔ اطلاعات کے مطابق منگل کے روز کم سے کم  157  یہودی آباد کاروں،

صہیونی فوجیوں اور یہودی ربیوں نے مراکشی دروازے سے قبلہ اول میں داخل ہو کر اس کی بے حرمتی کی۔
اقصیٰ فاؤنڈیشن وٹرسٹ کے میڈیا کوآرڈینیٹر محمود ابو العطا نے خبر رساں ایجنسی”الصفا” کو بتایا کہ پولیس اور سیکیورٹی اداروں نے انتہا پسندوں کو فول پروف سیکیورٹی مہیا کر رکھی تھی۔ انہوں نے کہا کہ یہودی آباد کاروں کے کئی گروپ کل منگل کو مسجد اقصیٰ میں داخل ہوئے۔

علی الصباح مسلمانوں اور فلسطینیوں سے نفرت میں مشہور یہودی ربی”یہودا گلیک” کی معیت میں کم سے کم  46  یہودی انتہا پسندوں نے مسجد اقصیٰ پر دھاوا بولا۔ یہ لوگ کئی گھنٹے تک مسجد کے اندر گھومتے رہے۔

ابھی یہ مسجد اقصیٰ کے اندرہی تھے کہ صہیونی فوج میں نئے بھرتی ہونے والے 90  مرد وخواتین رنگروٹ مراکشی دروازے سے قبلہ اول میں آدھمکے۔ اس موقع پر انہیں مسجد اقصیٰ کی جگہ مذموم ہیکل سلیمانی کی تعمیر کےحوالے سے بریفنگ دی گئی۔

بعد ازاں اسرائیلی انٹیلی جنس کے اہلکاروں کی معیت میں کم سے کم  21  یہودیوں کا ایک اور گرپ بھی مسجد اقصیٰ میں داخل ہوا جو اس کی گیلریوں اور چھتوں پربھی گھومتے رہے۔ عینی شاہدین کے مطابق صہیونی انٹیلی جنس کی معیت میں دھاوا بولنے والے یہودی آباد کار جامع مسجد القبلی، جامع مسجد القدیم، مصلیٰ المروانی اور قبۃ الصخرۃ میں گھومتے رہے۔

فلسطینی عہدیدار کا کہنا تھا کہ انتہا پسند یہودیوں کو مسجد اقصیٰ میں لانے اور انہیں وہاں مذہبی رسومات کی ادائی کا موقع فراہم کرنے کی جتنی بھی سازشیں ہو رہی ہیں ان میں اسرائیلی حکومت اور اس کے سیکیورٹی ادارے براہ راست ملوث ہیں۔ کیونکہ جب بھی یہودی آباد کار مسجد اقصیٰ میں داخل ہوتے ہیں تو انہیں پولیس اور فوج کی جانب سے سخت سیکیورٹی مہیا کی جاتی ہے۔ جبکہ فلسطینی نمازیوں کو جمعہ کے روز قبلہ اول میں داخلے سے بھی روکا جاتا ہے۔

محمود ابو العطاء نے انکشاف کیا کہ یہودی انتہا پسندوں کی بیت المقدس میں داخلے کی سازشوں میں اضافہ کرنے اور زیادہ سےزیادہ یہودیوں کو قبلہ اول میں لانے کے لیے مراکشی دروازے کے ساتھ اب باب القطانین کو بھی کھولنے کی سازش تیار کی جا رہی ہے۔ انہوں نے اسرائیلی حکومت اور فوج کی کارروائیوں کو قبلہ اول کی تقسیم کی سنگین سازش کا حصہ قرار دیا۔

بشکریہ:مرکزاطلاعات فلسطین