قابض اسرائیلی فوج نے یہودیوں کی عید”یوم کپور” کے موقع پر مقبوضہ مغربی کنارے کے تمام شہروں میں بڑی تعداد میں نفری تعینات کرکے علاقے کو سیل کر دیا ہے۔
مرکزاطلاعات فلسطین کے مطابق مغربی کنارے میں جمعرات ہی سے یہودی فوج کی بڑی تعداد کو تعینات کیا گیا۔ یہودیوں کی یہ تقریبات ہفتے کی شام تک جاری رہیں گی۔ اس دوران صہیونی فوج مغربی کنارے اور دیگر فلسطینی علاقوں میں بدستور تعینات رہے گی۔
مغربی کنارے کو سیل کیے جانے سے فلسطینیوں کو سخت مشکلات کا سامنا ہے۔ جمعہ کے روز اسرائیلی فوج نے مغربی کنارے اور مقبوضہ بیت المقدس کے درمیان سرحد سیل کر دی تھی جس کے باعث مسجد اقصیٰ میں نماز جمعہ ادا کرنے آنے والے شہریوں کو مشکلات سے دو چار ہونا پڑا۔اسرائیلی فوج نے پینتالیس سال سے کم عمر افراد کے بیت المقدس داخلے پر پابندی عائد کر دی تھی۔
خیال رہے کہ یہودیوں کا یوم کپور دو دن تک منایا جاتا ہے۔ اس دوران یہودی پچیس گھنٹے کا روزہ رکھتے ہیں اور اپنا بیشتر وقت عبادت میں گذارتے ہیں۔