ڈونلڈ ٹرمپ بائیڈن کی غلطی نہ دہرائیں، حماس

(روز نامہ قدس ۔آنلائن خبر رساں ادارہ) امریکی صدارتی الیکشن میں ڈونلڈ ٹرمپ کی فتح پر فلسطینی مزاحمتی تحریک حماس کا ردعمل آگیا۔ ترجمان حماس نے کہا ہے کہ نئی امریکی انتظامیہ کے بارے میں ہماری پوزیشن کا انحصار اس بات پر ہوگا کہ وہ فلسطینی عوام، ان کے جائز حقوق اور ان کے منصفانہ مقصد سے متعلق کیا مؤقف اختیار کرتے ہیں اور کیا عملی کام کرتے ہیں۔ 

ترجمان نے ٹرمپ کو متنبہ کرتے ہوئے کہا کہ وہ جوبائیڈن کی غلطی نہ دہرائیں، نئے صدر کو غزہ پر اسرائیلی جارحیت کو مسترد کرتے ہوئے خود امریکی برادری کی آوازوں کو سننا چاہیے، اس بات کا بھی احساس کرنا چاہیے کہ فلسطینی اسرائیل کے ناجائز قبضے اور جارحیت کا مسلسل مقابلہ کر رہے ہیں۔ ترجمان حماس نے یہ بھی کہا کہ نئے امریکی صدر کو اس بات کا بھی ادراک ہونا چاہیے کہ فلسطینی کسی بھی ایسے حل کو قبول نہیں کریں گے جو اُن کے حقوق کو تلف یا کم کرتا ہے۔