مغربی کنارے کے بلدیاتی انتخابات، سیاسی جماعتیں فتح کی دھاندلی سے خائف

 

مرکز اطلاعات فلسطین کے مطابق بائیں بازو کی سیاسی جماعتوں کا کہنا ہے کہ مغربی کنارے میں حکمراں جماعت الفتح صدر محمودعباس اور وزیراعظم سلام فیاض کی حکومت کا اثرو رسوخ استعمال کرتےہوئے بڑے پیمانے پر دھاندلی کی منصوبہ بندی کر رہی ہے۔ اب یہ بلدیاتی انتخابات شفاف ہونے کے امکانات کم سے کم ہوتے جا رہے ہیں۔

 

فلسطین پیپلز پارٹی کے سیکرٹری جنرل بسام الصالحی نے جمعرات کے روز رام اللہ میں ایک نیوز کانفرنس کے دوران بتایا کہ فتح نے الیکشن کمیشن سے سیکیورٹی عہدیداروں کے ووٹ ڈالنے اورپولنگ مراکز میں موبائل فون ساتھ رکھنے کی اجازت حاصل کرلی ہے، جس کے بعد یہ خدشہ پیدا ہوگیا ہے کہ مغربی کنارے میں ہونے والے یہ انتخابات اب غیرشفاف ہونے سے کوئی نہیں بچا سکتا ہے۔ انہوں نے کہا کہ تمام بائیں بازو کی جماعتوں نے الیکشن کمیشن سے مطالبہ کیا ہے کہ وہ سیکیورٹی اہلکاروں کے ووٹ اور پولنگ مراکز میں موبائل فون کے استعمال کی اجازت دینے کے فیصلوں پر نظرثانی کرے ورنہ ان دونوں سہولتوں کی فراہمی کا مقصد فتح کے لیے دھاندلی کی راہ کھولنے کے مترادف ہے۔

 

مرکز اطلاعات فلسطین کے مطابق رام اللہ کی سیاسی جماعتوں بالخصوص بلدیاتی انتخابات میں حصہ لینے والے گروپوں نے سیکیورٹی فورسز کے اہلکاروں کے ووٹ ڈالنے کی اجازت دینے کے الیکشن کمیشن کے فیصلے کو کڑی تنقید کا نشانہ بنایا ہے۔ سیاسی جماعتوں کا کہنا ہے کہ الیکشن کمیشن نے فتح کی من مانی شرائط تسلیم کرکے اپنی شفافیت اور غیرجانب داری کو بھی ٹھیس پہنچائی ہے اور اب فلسطینی عوام کا موجودہ الیکشن کمیشن پر اعتبار ختم ہوتا جا رہا ہے۔

 

پیلز پارٹی کے رہ نما بسام صالحی نے انکشاف کیا ہے کہ دھاندلی کی سازشیں الیکشن کمیشن پراثرانداز ہونے تک محدود نہیں ہیں بلکہ  فتح کے نامزد بلدیاتی نمائندوں نے مختلف شہروں میں لوگوں سے ووٹ خریدنے کا سلسلہ شروع کر رکھا ہے۔ ووٹ خرید کیے جانے کی روایت نے نہ صرف الیکشن کمیشن کے کرادر پرسوالیہ نشانہ چھوڑے ہیں بلکہ فتح کے سیاسی کیرئیر کو بھی داغدار کیا ہے۔