مغربی کنارے میں فلسطینیوں پر اسرائیلی فوج کے مظالم جاری ہیں۔ جنین اور بیت لحم کے شہروں میں فلسطینی شہریوں اور اسرائیلی فوج کے درمیا ن خوفناک جھڑپیں ہوئیں جس میں متعدد افراد زخمی ہوگئے ۔ ادھر نابلس شہر میں صہیونی اہلکاروں نے تین افراد کو حراست میں لے لیا ۔
تفصیلات کے مطابق اسرائیلی فوج نے جنین شہر کی مختلف کالونیوں پر دھاوا بول کر توڑ پھوڑ شروع کردی۔ کئی افراد کو زدوکوب کیا گیا جس پر مشتعل شہریوں اور صہیونی اہلکاروں کے درمیان جھڑپیں شروع ہوگئیں۔ اسرائیلی فوج نے ایک مطلوب شخص کی تلاش میں بڑے پیمانے پر گھر گھر تلاشی کی کارروائی شروع کردی جس پر شہر کی مشرقی کالونی میں فلسطینیوں کی فورسز کے اہلکاروں کے ساتھ خوفناک جھڑپیں شروع ہوگئیں۔ مقامی ذرائع نے بتایا کہ اسرائیلی اہلکاروں نے مجدی خضر اغباریہ نامی تیس سالہ فلسطینی کے گھر پر چھاپہ ماراکر بڑے پیمانے پر توڑ پھوڑ کی ہے۔
مغربی کنارے کے دوسرے شہر بیت لحم کے شمالی علاقے قبہ راحیل میں بھی اس وقت جھڑپیں شروع ہوگئیں جب اسرائیلی فوج کی بڑی تعداد نے علاقے پر دھاوا بول دیا ۔ فلسطینی نوجوانوں کی بڑی تعداد نے صہیونی اہلکاروں پر پتھراؤ کیا جس کی زد میں آکر ایک اسرائیلی فوجی کے کے زخمی ہونے کی اطلاعات بھی موصول ہوئی ہیں۔ جوابی کارروائی میں صہیونی اہلکاروں نے فلسطینی نوجوانوں پر ربڑکی گولیوں اور اشک آور گیس کے شیلوں کی بوچھاڑ کردی۔
مغربی کنارے کے شمالی شہر نابلس میں پیرکی علی الصبح اسرائیلی فوج نے چھاپہ مار کارروائیاں کرکے تین مختلف مقامات سے تین افراد کو حراست میں لے لیا۔ مقامی ذرائع کے مطابق شہر کے جنوبی علاقے الجبل پر بولے گئے ہلے میں القیم خاندان کے گھر میں گھس کر توڑ پھوڑ کی گئی اورعماد نھاد نامی نوجوان کو گرفتار کرلیا گیا۔ اسی طرح کی کارروائیوں میں مزید دو افراد کو حراست میں لیا گیا تاہم ان دونوں کی شناخت تاحال معلوم نہیں ہوسکی۔
بشکریہ:مرکز اطلاعات فلسطین