فلسطین کی مختلف مذہبی اور سیاسی شخصیات نے اجتماعی طورپر خبردار کیا ہے کہ صہیونی حکومت مسجد اقصیٰ کے مراکشی دروازے کی راہ داری مسمار کرکے اس کی جگہ ملٹری پُل کی تعمیر کی سازش کر رہا ہے۔
مرکزاطلاعات فلسطین کے مطابق فلسطین کی مختلف سیاسی اور مذہبی شخصیات نے منگل کو ایک نیوز کانفرنس میں خبردار کیا ہے کہ صہیونی حکومت بیت المقدس کو یہودیانے بالخصوص مسجد اقصیٰ کے مراکشی دروازے کی جگہ ایک نیا خطرناک ڈرامہ کرنے کی منصوبہ بندی کر رہی ہے، جو اپنے نتائج کے اعتبار سے نہایت خطرناک ہے۔نیوز کانفرنس سے خطاب کرتے ہوئے مقبوضہ فلسطین میں قائم اسلامی تحریک کے سربراہ اور بزرگ فلسطینی لیڈر شیخ رائد صلاح نے بتایا کہ اسرائیل مسجد اقصیٰ کے مراکشی دروازے کو مسمار کرنے کے بعد اس کی طرف آنے والی راہ داری پر ایک پل تعمیر کرنے کا ارادہ رکھتا ہے جس کا مقصد یہودیوں کی قبلہ اول تک رسائی کو آسان بنانا ہے۔ نیوز کانفرنس میں مسجد اقصیٰ کے خطیب ڈاکٹر الشیخ عکرمہ صبری، سپریم عرب عوامی کونسل کے چیئرمین محمد زیدان، الفتح کے رہ نما اور جماعت کے القدس امور کے نگران حاتم عبدالقادر نے عالم اسلام اور عرب ممالک سے مطالبہ کیا کہ وہ صہیونی حکومت کو مراکشی دروازے کی راہ داری کی جگہ پُل کی تعمیر کی سازش سے باز رکھیں۔
نیوز کانفرنس میں صحافیوں اور میڈیا کے نمائندوں کو ایک ویڈیو بھی دکھائی گئی جس میں مسجد اقصیٰ کے مراکشی دروازے کی مسمار شدہ راہ داری اور اس کی جگہ پل کی تعمیر کے لیے کی گئی کھدائیوں کی تفصیلات اور ان کی تصاویر دکھائی گئی تھیں۔ یہ کھدائیاں حال ہی میں کی گئی ہیں جو پہلے تو خفیہ تھیں تاہم انہیں علی الاعلان شروع کر دیا گیا ہے۔
بشکریہ: مرکز اطلاعات فلسطین