دنیا بھر سے یہودیوں کو مقبوضہ فلسطین منتقل کرنے کے لیے قائم کیے گئے اسرائیلی ادارے نے امازون کے کنارے لاطینی امریکا کے ملک پیرو میں آباد ریڈ انڈینز کے ایک گروہ کے یہودی الاصل ہونے کی تصدیق کردی ہے اور اب ان کو مستقل طور پر اسرائیل منتقل کرنے کی تیاریاں جاری ہیں۔
اسرائیلی ذرائع ابلاغ کے مطابق اگلے کچھ عرصے کے دوران سو افراد پر مشتمل ایک گروہ ایکواٹوس شہر چھوڑ کر فلسطین آ بسے گا۔ لاطینی امریکا کے ملک پیرو کا یہ شہر دریائے امازون کے کنارے آباد ہے۔
یہودی ایجنسی کے دعوے کے مطابق یہ ریڈ انڈینز یہودیوں کی منفرد نسل سے تعلق رکھتے ہیں، انکے آباءواجداد انییسویں صدی میں یہودی تھے، یہ مغربی عرب سے ہجرت کر کے یہاں آ بسے تھے ہجرت کرنے والوں میں اکثر مرد تھے، ذرائع کے مطابق اس شہر میں آکر آباد ہونے والے ان خاندانوں نے امیزون کے قریب علاقوں میں رہائش اختیار کرلی اور یہاں پر ربڑ کا کام شروع کر دیا۔
ذرائع کے مطابق ان قدیم یہودیوں کی حالیہ نسل اور یہودی مذہبی تنظیم کے درمیان دسیوں سال قبل سے تعلقات استوار ہیں اور یہ لوگ اسرائیل میں رہائش اختیار کرنے کے لیے بے تاب ہیں۔ اس ضمن میں نوے کی دہائی میں ان ریڈ انڈینز کا ایک گروپ اسرائیل پہنچا تھا، اس کے بعد مزید ایک گروپ کو اسرائیل میں بسایا گیا، بارہ سال قبل اکیسویں صدی کے آغاز میں 250 افراد پر مشتمل ایک گروہ نے اسرائیل کی جانب ہجرت کی تھی۔ کچھ عرصہ قبل سو افراد کی اسرائیل کی جانب نقل مکانی کی درخواست کو رد کردیا گیا تھا۔
یہودی ایجنسی کے ایک ذمہ دار نے بتایا کہ اس گروپ کے کچھ افراد کے پاس ایسے مستند ثبوت ہیں جن سے انکے یہودی ہونے کا پتہ چلتا ہے اور ایجنسی نے اس کی تصدیق بھی کردی ہے تاہم اسرائیلی وزارت داخلہ نے کچھ مزید شرائط عائد کر دی ہیں، ان ضروری ضوابط اور کارروائیوں کو مکمل کرنے کے بعد آخر کار اس گروپ کی اسرائیل کی جانب ہجرت کی منظوری دیدی جائے گی۔
بشکریہ:مرکز اطلاعات فلسطین