اسرائیلی فوج نے منگل کے روز سے صحرائے نقب میں فلسطینی مزاحمت کاروں کے ہاتھوں فوجیوں کے اغواء کے تناظر میں مشقیں شروع کی ہیں۔
اسرائیلی فوجی ذرائع کے مطابق یہ جنگی مشقیں دو روز تک جاری رہیں گی جن میں اسرائیلی فوجیوں کو فلسطینی مزاحمت کاروں کے قبضے میں چلے جانے والے اہلکاروں کو چھڑانے اور اغواء کی وارداتیں رکوانے کی مختلف تکنیکس سکھائی جائیں گی۔ ذرائع کے مطابق تازہ مشقوں میں بری، بحری اور فضائی فوج سمیت تمام اہم فوجی اداروں کے مخصوص اہلکارحصہ لے رہے ہیں۔
ذرائع کا یہ بھی کہنا ہے کہ حال ہی میں فلسطینی مزاحمتی تنظیم حماس کے ساتھ قیدیوں کی ایک بڑی ڈیل کے بعد صہیونی فوجی حلقوں میں یہ بحث زور پکڑ گئی ہے کہ اس ڈیل نے فلسطینی مزاحمت کاروں کے حوصلے بلند کیے ہیں اور وہ اسرائیلی فوجیوں کے اغواء کے لیے زیادہ سرگرمی سے حصہ لے رہے ہیں۔ خیال رہے کہ گذشتہ برس نومبر میں فلسطینی اسلامی تحریک مزاحمت "حماس” اور اسرائیل کے درمیان قیدیوں کے تبادلے کے ایک سمجھوتے کے تحت اسرائیل نے اپنے ایک فوجی اہلکار کے بدلے میں ایک ہزار پچاس فلسطینی رہا کیے تھے۔