اسرائیلی وزیرخارجہ آوی گیڈولائبرمین نے ایک مرتبہ پھر فلسطینی شہرغزہ کی پٹی پر حملے کی دھمکی دی ہے۔ ان کا کہنا ہے کہ فلسطینی مزاحمت کاروں نے یہودی کالونیوں پر راکٹ حملوں کا سلسلہ جاری رکھا تو وہ کسی بھی وقت غزہ کی پٹی پرفوج کے ذریعے چڑھائی کر سکتے ہیں۔
اسرائیلی ریڈیو کے مطابق ایک بیان میں صہیونی وزیرخارجہ نے کہا کہ فلسطینی مزاحمتی گروپ اسرائیلیوں کا امن تباہ کرنا چاہتے ہیں لیکن وہ یہودیوں کا سکون چھین لینے والوں سے آہنی ہاتھوں سے نمٹیں گے۔
صہیونی وزیرخارجہ کے بہ قول”ہم کسی فلسطینی دہشت گرد تنظیم یا فرد کواسبات کی اجازت نہیں دیں گے کہ وہ ہمارے شہریوں کی جانوں کو خطرے میں ڈالےیا ہمارے نظام زندگی کو مفلوج کرے۔ فلسطینی مزاحمتی تنظیموں کے ساتھ کسی قسم کی جنگ بندی نہیں کی گئی۔ راکٹ حملوں کے جواب میں کسی بھی وقت غزہ کے کسی بھی علاقےپر حملہ کر سکتے ہیں۔
ادھر دوسری جانب اسرائیل کے نائب وزیراعظم سلیفان شالوم نے بھی غزہ کی پٹی پر فلسطینی مزاحمت کاروں کے خلاف سخت کارروائی کی دھمکی دی ہے۔ مسٹرسلیفان کہنا ہےکہ غزہ کی سرحد پر اسرائیل کو جس طرح کی صورت حال کا سامنا ہے وہ ناقابل برداشت ہے۔ایک بیان میں انہوں نے کہا کہ ہم نے بہت صبر کر لیا۔ اس کے بعد مزید صبر کی کوئی گنجائش باقی نہیں رہی۔