فلسطینی نوجوانوں کی رام اللہ میں اسرائیلی فوج سے شدید جھڑپیں

مغربی کنارے کے انتظامی دارالحکومت رام اللہ کے جنوب میں واقع اسرائیلی جیل عوفر کے قریب فلسطینی نوجوانوں کی اسرائیلی فوج کے ساتھ خوفناک جھڑپوں میں متعدد فلسطینی زخمی ہو گئے، اس موقع پر سیٹلائٹ چینل ’’القدس‘‘ کی خاتون نمائندہ لنڈا شلش بھی زخمی ہوگئی۔

اسرائیلی روزنامے ’’یدیعوت احرونوت‘‘ کے مطابق مقامی افراد نے بتایا کہ جھڑپیں اس وقت شروع ہوئیں جب عوفر جیل کی انتظامیہ نے ’’تبادلہ اسیران‘‘ معاہدے کے دوسرے مرحلے میں رہا کیے جانے والے اسیران کی رہائی میں بے جاٹ ال مٹول سے کام لیا۔
تفصیلات کے مطابق اسرائیل نے اتوار کے روز شام آٹھ بجے قیدیوں کو رہا کرنا تھا، جس میں سے چالیس اسیران کو کرام ابو سالم چیک پوسٹ کے ذریعے غزہ اور چار کو اردن اور القدس اور 506 کو عوفر جیل سے رہا ہو کر مغربی کنارے میں موجود اپنے گھروں کو جانا تھا۔ تاہم انتظامیہ نے انہیں رہا کرنے میں بے جا تاخیر کرنا شروع کر دی جس پر جیل کے باہر آنے والے فلسطینی نوجوانوں نے مشتعل ہو کر اسرائیل کے خلاف نعرے بازی اور پتھراؤ شروع کر دیا اور دونوں طرف سے باقاعدہ جھڑپیں شروع ہوگئیں۔
اس موقع پر مظاہرین کو منتشر کرنے کے لیے اسرائیلی فوج نےاشک آور گیس کے شیل اور ربڑ کی گولیاں برسائیں جس کی زد میں آکر القدس چینل کی خاتون صحافی سمیت متعدد افراد زخمی ہو گئے۔