اسرائیل کی ایک فوجی عدالت نے زیر حراست ایک فلسطینی نوجوان پر دو یہودی آباد کاروں کو ہلاک اور متعدد کو زخمی کرنے کے الزام میں فرد جرم عائد کی ہے۔
رپورٹ میں بتایا گیا ہے کہ گذشتہ روز اسرائیل ملٹری پراسیکیوٹر نے عدالت میں 36 سالہ فلسطینی راید خلیل کے خلاف فرد جرم پیش کی۔ راید کا تعلق مغربی کنارے کے جنوبی شہر الخلیل کے جنوبی قصبے دورا سے ہے۔ اس پر الزام ہے کہ اس نے چند ہفتے قبل تل ابیب کے ایک شاپنگ مال میں گھس کرچاقو سے حملوں میں کم سے کم دو صہیونیوں کو ہلاک کردیا تھا۔فرد جرم کی تفصیلات میں کہا گیا ہے کہ فلسطینی ملزم نے تل ابیب کے ایک مصروف شاپنگ مال میں گھس کر ’’اھرون یسیف‘‘ اور ’’رؤفین ابیرام‘‘ نامی یہودیوں کو چاقو کے پے درپے وار کرکے ہلاک متعدد کو زخمی کردیا تھا۔
اسرائیلی پولیس نے فلسطینی حملہ آور کو حراست میں لے لیا تھا جس کے بعد اسے دوران حراست انسانیت سوز تشدد کا نشانہ بنایا گیا ہے۔ عدالت نے تحقیقات مکمل ہونے تک خلیل راید کو پولیس کی تحویل میں رکھنے کا حکم دیا ہے۔