مصر کے نومنتخب صدر ڈاکٹر محمد مرسی نے کہا ہے کہ وہ عالمی معاہدوں کی پابندی کرتے ہیں لیکن فلسطینیوں کے حقوق کا مقدمہ بھی پوری قوت سے لڑیں گے۔ انہوں نے تمام فلسطینی سیاسی جماعتوں پر زور دیا کہ وہ آپس میں اتحاد پیدا کریں۔
مرکزاطلاعات فلسطین کے مطابق مصر کے نو منتخب صدر ڈاکٹر محمد مرسی نے ان خیالات کا اظہار ہفتےکے روز دستوری عدالت کے سامنے حلف برداری کے بعد قوم سے مختصر خطاب میں کیا۔ انہوں نے کہا کہ فلسطینیوں کو ان کے حقوق دلانے کے لیے عالمی برادری کے تعاون کی ضرورت ہے۔ جہاں تک مصر کی ضرورت پڑے گی مصری عوام اور حکومت فلسطینیوں کے حقوق کی حمایت کریں گے۔
بعد ازاں مصری صدر نے جامعہ الازھر میں اپنے اعزاز میں منعقدہ ایک تقریب سے بھی خطاب کیا۔انہوں نے کہا کہ ہم عالمی معاہدوں کی خلاف ورزی نہیں کریں گے لیکن ہمیں توقع ہے کہ عالمی برادری بھی ہم سے کیے گئے معاہدوں کا احترام کرے۔
ڈاکٹر محمد مرسی نے کہا کہ مصری قوم ماضی میں بھی فلسطینیوں کی پشت پر کھڑی رہی ہے اور مستقبل میں بھی فلسطینیوں کے حقوق کی حمایت کرتی رہے گی۔ انہوں نے کہا کہ ہم فلسطینیوں کو ایک صف میں کھڑا کرنے کے لیے ان کے درمیان اتحاد پیدا کرنے کی تمام تروسائل اور کوششیں بروئے کار لائیں گے۔
مصری صدرکا کہنا تھا کہ ہمیں عرب دنیا اور مصر کی قومی سلامتی کا ادراک ہے۔ ہم نہ تو مصر کی سلامتی کو خطرے میں ڈالیں گے اور نہ ہی عرب ممالک کی سلامتی پر آنچ آنے دیںگے۔
بشکریہ: مرکز اطلاعات فلسطین