فلسطینی شہریوں اور عباس ملیشیا کے درمیان پرتشدد جھڑپیں

فلسطین کے مقبوضہ مغربی کنارے کے شہر طولکرم کے نورشمس پناہ گزین کیمپ میں فلسطینی اتھارٹی کے زیرانتظام سیکیورٹی فورسز اور مقامی شہریوں کے درمیان پرتشدد جھڑپوں کی اطلاعات ہیں۔ عباس ملیشیا کے تشدد کے نتیجے میں متعدد افراد زخمی ہوئے ہیں اور کئی کو حراست میں لے لیا گیا ہے۔

مرکزاطلاعات فلسطین کے مطابق طولکرم میں قائم پناہ گزین کیمپ نورشمس میں عباس ملیشیا اور کیمپ کے مکینوں کے درمیان اس وقت جھڑپیں شروع ہوئیں جب سیکیورٹی فورسز نے کیمپ پر دھاوا بول کر گھر گھر تلاشی کا سلسلہ شروع کر دیا۔

عینی شاہدین نے بتایا کہ عباس ملیشیا نے ایک بلڈوزر بھی کیمپ پر چڑھا دیا اور شہریوں کے گھروں پر آنسو گیس کی شیلنگ کی جس کے رد عمل میں شہریوں نے بھی جوابی کارروائی کی اور عباس ملیشیا کے اہلکاروں پر پٹرول بم اور پھتر پھینکے۔

کیمپ کےایک مقامی ذرائع نے بتایا کہ عباس ملیشیا اور شہریوں کے درمیان پرتشدد جھڑپوں کے بعد کیمپ کے عماید اور سیکیورٹی حکام کے درمیان بات چیت بھی ہوئی۔ مذاکرات کے بعد عباس ملیشیا کے اہلکار کیمپ سے نکل گئے تھے۔ تاہم عباس ملیشیا کی آنسو گیس کی شیلنگ کے نتیجے میں کم سے کم 15 افراد زخمی ہوئے ہیں۔

ادھر کیمپ میں پچھلے ایک ہفتے سے بجلی معطل ہے۔ دو روز قبل نامعلوم افراد نے کیمپ میں بجلی کے مرکز کو آگ لگا دی تھی۔

بشکریہ:مرکزاطلاعات فلسطین