فلسطینی متحارب جماعتوں اسلامی تحریک مزاحمت "حماس” اور الفتح کی قیادت میں طے پائے حالیہ مفاہمتی سمجھوتے پر عرب ممالک اور پورے عالم اسلام کی جانب سے خیر مقدم کیا جا رہا ہے۔
ترکی نے فلسطینیوں کے باہمی مصالحتی سمجھوتے کی حمایت کرتے ہوئے فریقین پر زور دیا ہے کہ وہ معاہدہ قائم رکھنے کے لیے اب ثابت قدمی کا مظاہرہ کریں۔
مرکز اطلاعات فلسطین کے مطابق ترکی کے وزیرخارجہ احمد داؤد اوگلو نے فلسطینی صدر محمود عباس سے ٹیلیفون پر بات چیت کرتے ہوئے انہیں حماس اور فتح کے درمیان مفاہمتی معاہدے کرانے پر مبارک باد پیش کی۔۔
ادھر فلسطینی خبر رساں ایجنسی "وفاء” کے مطابق احمد داؤد اوگلو نے جمعرات کی شام کو فلسطینی اتھارٹی کے سربراہ محمود عباس کو ٹیلیفون کیا۔ دونوں رہ نماؤں کے درمیان مسئلہ فلسطین کی تازہ صورت حال اور قومی مفاہمتی معاہدے پر تبادلہ خیال کیا گیا۔ فلسطینی صدر محمود عباس نے یقین دلایا کہ الفتح اور حماس کے درمیان صلح قائم رہے گی۔ ترک وزیرخارجہ نے یقین دلایا کہ ان کا ملک فلسطینیوں کی حمایت جاری رکھے گا۔ انہوں نے کہا کہ فلسطینی گروپوں کی صلح سے پوری ترک قوم کو خوشی ہوئی ہے۔
خیال رہے کہ فلسطینی جماعتوں حماس اور الفتح کے درمیان بدھ کے روز غزہ کی پٹی میں ایک مفاہمتی سمجھوتہ طے پایا ہے۔ اس معاہدے کے تحت ایک ماہ میں قومی حکومت کی تشکیل اور چھ ماہ میں پارلیمانی انتخابات کرانے پر اتفاق کیا گیا ہے۔
بشکریہ:مرکزاطلاعات فلسطین