( روز نامہ قدس ۔آنلائن خبر رساں ادادہ) غزہ میں جنگ بندی کے معاہدے اور قیدیوں کے تبادلے کے لیے سفارتی کوششیں تیز ہوگئی ہیں۔ مصری صدر عبدالفتاح السیسی نے امریکی قومی سلامتی کے مشیر جیک سلیوان اور مشرق وسطیٰ کے رابطہ کار بریٹ میک گرک کے ساتھ قاہرہ میں ملاقات کی ہے ۔
اس ملاقات میں جنگ بندی اور قیدیوں کے تبادلے کے حوالے سے مشترکہ کوششوں کا جائزہ لیا گیا، اور غزہ کی پٹی میں انسانی امداد کی فوری فراہمی کی اہمیت پر زور دیا گیا، خاص طور پر موسم سرما کے آغاز کے ساتھ۔ السیسی نے دو ریاستی حل کو مشرق وسطیٰ میں امن اور استحکام کی بنیاد قرار دیا۔
دوسری جانب، جمعہ کو جیک سلیوان نے اسرائیل اور حماس کے درمیان قیدیوں کے تبادلے کے معاہدے کے قریب پہنچنے کی بات کی، اور کہا کہ اسرائیل جنگ بندی کے لیے تیار ہے اور مغوی افراد کو واپس کرنے پر راضی ہے۔ سلیوان نے تل ابیب میں صحافیوں کو بتایا کہ اسرائیل کی طرف سے حماس کے رہنماؤں کی ہلاکت اور تنظیم کے فوجی ڈھانچے کی تباہی کے بعد، معاہدے تک پہنچنے کا وقت آ چکا ہے۔ تاہم، انہوں نے واضح کیا کہ ابھی تک کوئی معاہدہ نہیں ہوا ہے اور وہ خطے میں موجود ہیں تاکہ اس بات کو یقینی بنایا جا سکے کہ معاہدہ مکمل ہو۔