فلسطینی شہر غزہ کی پٹی میں بارڈر امور کے نگران ماہر ابو صبحہ نے بتایا ہے کہ چند روز قبل مصر سے ملحقہ رفح گذرگاہ کو عارضی طورپر کھولنے کا فیصلہ کیا گیا ہے۔
گذرگاہ آج جمعہ اور کل ہفتے کے روز دو طرفہ آمد ورفت کے لیے کھلی رہے گی۔
مرکزاطلاعات فلسطین کے مطابق ایک بیان میں ابو صبحہ نے کہا کہ فلسطینی اور مصری حکام کے درمیان رابطوں کے بعد رفح کراسنگ کو عارضی طورپر کھولنے اور دونوں طرف پھسنے شہریوں کو سرحد عبور کرنے کی اجازت دینے کا فیصلہ کیا گیا ہے۔ ان میں غزہ کی پٹی کے عمرہ کی ادائیگی کی غرض سے سے بیرون ملک جانے والے مسافر بھی شامل ہیں۔ اس کےعلاہ بڑی تعداد میں مال بردار ٹرک بھی سرحد پر مصرکی جانب غزہ کی پٹی میں داخلے کے لیے کئی روز سے کھڑے ہیں۔ انہوں نے توقع ظاہر کی کہ دونوں ملکوں کے درمیان سیناء میں مصری فوجیوں کے قتل کے بعد بند کی گئی گذرگاہ معمول کےمطابق جلد کھول دی جائے گی۔
خیال رہے کہ مصر اور غزہ کی پٹی کےدرمیان گذشتہ اتوار کو مصری فوجیوں پر نامعلوم افراد کے حملے کے بعد رفح بارڈر کو غیر معینہ مدت کے لیے بند کردیا گیا تھا۔ رفح بارڈر کی بندش کے باعث فلسطینیوں کو سخت مشکلات کا سامنا کرنا پڑا ہے، کیونکہ غزہ کی پٹی کا بین الاقوامی دنیا سے زمینی رابطے کا واحد ذریعہ رفح کراسنگ ہے۔ شہر کے بقیہ تین اطراف پر اسرائیل کا غاصبانہ قبضہ ہے جس کے باعث غزہ کے شہری کسی دوسری سمت بھی نہیں جاسکتے ہیں۔
بشکریہ: مرکز اطلاعات فلسطین