غزہ اور غرب اردن کے مختلف علاقوں پر اسرائیلی فوجیوں کی جارحیت

(فلسطین نیوز۔مرکز اطلاعات) رپورٹ کے مطابق غزہ کے البریج کیمپ کی مشرقی سرحدوں پر تعینات صیہونی فوجیوں نے جمعرات کی رات فلسطینیوں پر اندھادھند فائرنگ کردی جس کے نتیجے میں کم از کم ایک فلسطینی شدید طور پر زخمی ہو گیا۔ صیہونی فوجیوں نے جمعرات کے روز خان یونس کے مشرق میں واقع علاقے الفراحین میں بھی فائرنگ کرکے تین فلسطینیوں کو زخمی کردیا تھا۔ صیہونی فوجیوں نے اسی طرح بلڈوزروں اور بکتر بند گاڑیوں کی مدد سے خان یونس کے شمال میں واقع قصبے قرارہ کے مشرقی علاقے پر حملہ کرکے زرعی زمینوں کو بھاری نقصان پہنچایا۔ الاقصی ٹیلیویژن نے بھی رپورٹ دی ہے کہ غرب اردن کے علاقے الخلیل میں واقع العروب کیمپ میں صیہونی فوجیوں اور فلسطینیوں کے درمیان شدید جھڑپیں ہوئی ہیں جہاں صیہونی فوجیوں نے کئی فلسطینیوں کو زخمی کرنے کے علاوہ متعدد دیگر کو حراست میں لے لیا۔ فلسطینیوں کے خلاف صیہونی حکومت کے جرائم کا یہ سلسلہ ایسی حالت میں جاری ہے کہ صیہونی حکومت کے سابق وزیر خارجہ لیبرمین نے صیہونی وزیر اعظم نیتن یاہو سے، ہر طرح کی جارحیت کا ارتکاب کرکے انتفاضۂ قدس کو کچلنے کی اپیل کی ہے۔ واضح رہے کہ صیہونی حکومت کی جارحیت کے نتیجے میں رواں سال کی یکم اکتوبر سے انتفاضۂ قدس شروع ہوئی ہے اور جب سے اب تک صیہونی فوجیوں کے ہاتھوں ایک سو پچّیس فلسطینی شہید اور سیکڑوں دیگر زخمی ہو چکے ہیں جبکہ درجنوں فلسطینیوں کو صیہونی حکومت نے حراست میں لے لیا ہے۔