الخلیل شہر کے نزدیک واقع عروب مہاجر کیمپ پر اسرائیلی فوج کے حملے کے بعد فوجیوں اور فلسطینی شہریوں کے درمیان جھڑپیں شروع ہو گئیں۔ جھڑپوں کے دوران اسرائیلی فوج نے شہریوں پر آنسو گیس کے شیل اور ربڑ کی گولیاں چلائیں جس کے نتیجے میں کئی شہریوں کو سانس میں لینے میں دشواری کا سامنا کرنا پڑا۔
مقامی ذرائع نے مرکز اطلاعات فلسطین کے نمائندے کو بتایا کہ صیہونی فوج کے حملے کے دوران ایک شہری زخمی ہوگیا تھا۔
ذرائع نے مزید بتایا کہ اسرائیلی فوج کیمپ میں آئی اور اس نے کیمپ کے سامنے موجود پہاڑی پر جگہ سنبھال لی۔ یہ وہی جگہ ہے جہاں پر پچھلے کچھ دنوں میں شہریوں اور قابض فوجیوں کے درمیان شدید جھڑپیں ہوئیں ہیں۔
اسی طرح کے ایک اور واقعہ میں الخلیل کے قدیم شہر اور ابراہیمی مسجد کے قریب تعینات قابض فوجیوں نے دو فلسطینی کم سن بچوں کو گرفتار کرلیا اور انہیں ایک قریبی تفتیشی مرکز لے گئے۔
اسی دوران قابض حکام نے فلسطینی کسانوں کو فوار کیمپ میں موجود اپنے کھیتوں پر جانے سے روک دیا۔ انہوں نے بتایا کہ وہ علاقہ فوج کے زیر استعمال ہے۔
اسرائیلی فوج نے حال ہی میں فوار کیمپ کی حدود میں واقع زمین کے مالکوں کو اپنی زمینوں پر آنے سے روک دیا جو کہ ایک اسرائیلی بستی قائم کرنے کا پیش خیمہ ہو سکتا ہے۔
بشکریہ:مرکز اطلاعات فلسطین