نابلس (روز نامہ قدس ۔آن لائن خبر رساں ادارہ) مغربی کنارے میں منگل اور بدھ کی درمیانی شب نابلس شہر کے مشرق میں اسرائیلی فوج نے فائرنگ کر کے دو فلسطینی نوجوانوں کو شہید کر دیا۔
روز نامہ قدس کو موصول ہونے والی اطلاعات کے مطابق فلسطینی وزارت صحت نے بتایا ہے کہ ایک گاڑی میں سوار 21 سالہ رائد حمدان اور 20 سالہ زید نوری کو اس اندھا دھند فائرنگ کا نشانہ بنایا گیا جب وہ نابلس کے اطراف میں واقع حضرت یوسف علیہ السلام کے مزار کے قریب سے گزر رہے تھے۔ دونوں نوجوانوں نے موقع پر ہی دم توڑ دیا۔
دوسری جانب اسرائیلی فوج کا دعوی ہے کہ مذکورہ مقام کا دورہ کرنے والے یہودیوں پر دھماکا خیز مواد پھینکا گیا تھا جس پر اسرائیلی فوج فائرنگ کرنے پر مجبور ہو گئی۔
اسرائیلی فوج نے منگل کے روز بھی ایک فلسطینی نوجوان کو موت کے گھاٹ اتار دیا تھا۔ اسرائیلی داخلہ سکیورٹی کے دارے کے مطابق اس فلسطینی پر شبہ تھا کہ اس نے مقبوضہ مغربی کنارے میں ایک اسرائیلی راہب اور ایک فوجی کو ہلاک کیا تھا۔ کارروائی میں اسرائیلی سکیورٹی فورسز نے مغربی کنارے میں رام اللہ شہر کے شمال میں واقع گاؤں عبوین میں ایک عمارت کا محاصرہ کر لیا جہاں عمر امین ابو لیلی روپوش تھا۔
قبل ازیں منگل کی شام اسرائیلی فوج نے رام اللہ میں عبوین کے مقام پر ایک کارروائی میں عمر ابو لیلیٰ کو گولیاں مار کر شہید کر دیا تھا۔ عمر ابو لیلیٰ پر الزام تھا کہ اس نے اتوار کے روز سلفیت میں مزاحمتی کارروائی کے دوران تین یہودیوں کو ہلاک اور متعدد کو زخمی کر دیا تھا۔