غاصب اسرائیل کی مغربی کنارے میں گھروں پر یلغار اور گرفتاریوں کی لہر

(روزنامہ قدس ـ آنلائن خبر رساں ادارہ) قابض اسرائیلی افواج نے جمعرات کی صبح مغربی کنارے کے مختلف علاقوں میں وسیع پیمانے پر کارروائیاں کیں جس کے نتیجے میں متعدد شہریوں کو گرفتار کیا گیا اور کئی مقامات پر جھڑپیں بھی ہوئیں۔

مقامی ذرائع کے مطابق اسرائیلی قابض افواج نے مغربی کنارے کے شہروں جنین، نابلس، اور الخلیل پر دھاوا بولا اور شہریوں کے گھروں میں گھس کر اندھا دھند گرفتاریاں کیں۔

ذرائع نے مزید بتایا کہ سفاک صہیونی فوج نے رام اللہ کے شمال مشرق میں واقع بلعین سلواد، الخلیل کے شمال مشرق میں سعیر، بیت لحم کے مشرق میں بیت تعمر گاؤں، اور نابلس کے جنوب میں بیتا پر بھی چھاپے مارے۔

فلسطینی فیلڈ کے اعداد و شمار کے مطابق غزہ میں جاری نسل کشی کے ساتھ ساتھ مغربی کنارے اور مقبوضہ بیت المقدس میں قابض اسرائیلی افواج اور مسلح صہیونی غنڈوں نے اب تک کم از کم ایک ہزار سترہ فلسطینیوں کو شہید کیا ہے اور تقریباً ساتھ ہزارافراد کو زخمی کیا ہے۔ اس کے علاوہ، اٹھارہ ہزار پانچ سوسے زائد شہریوں کو گرفتار بھی کیا گیا ہے۔

امریکی حمایت کے ساتھ قابض اسرائیل نے ساتھ اکتوبر 2023 سے غزہ میں اجتماعی نسل کشی کا سلسلہ شروع کیا جس میں اب تک تراسٹھ ہزار ساتھ سو چھیالیس فلسطینی شہید ہو چکے ہیں اور دو لاکھ پینتالیس ہزا زخمی ہوئے ہیں جن میں اکثریت خواتین اور بچوں کی ہے۔ اس دوران، دس ہزارسے زائد افراد لاپتہ ہیں جبکہ لاکھوں فلسطینی اپنے گھروں سے بے گھر ہونے پر مجبور ہو گئے ہیں۔ قابض اسرائیل کی مسلط کردہ قحط سالی کے باعث بدھ تک تین سو سڑسٹھ فلسطینی شہید ہوئے جن میں ایک سو اکتیس معصوم بچے بھی شامل ہیں۔