الخلیل (روز نامہ قدس ۔آن لائن خبر رساں ادارہ) فلسطین کے مقبوضہ مغربی کنارے کے الخلیل شہر میں رام اللہ اتھارٹی کے سیکیورٹی اداروں نے سابق رکن پارلیمنٹ اور اسلامی تحریک مزاحمت (حماس) کے رہنما ابراہیم ابو سالم کو حراست میں لے لیا ہے۔
روز نامہ قدس کو موصول ہونے والی اطلاعات کے مطابق ایک ماہ قبل فلسطینی صدر عباس کی طرف سے پارلیمنٹ تحلیل کیے جانے کے بعد عباس ملیشیا کےہاتھوں کسی سابق رکن پارلیمنٹ کی گرفتاری کا یہ پہلا واقعہ ہے۔
خیال رہے کہ سابق رکن اسمبلی ابراہیم ابو سالم کا تعلق القدس کے نواحی علاقے بیر نبالا سے ہے۔ فلسطینی پارلیمنٹ کا رکن منتخب ہونے سے قبل وہ جامعہ القدس کے پروفیسر تھے۔
وہ کئی سال تک اسرائیلی جیلوں میں قید رہے اور مرج الزھور بدر کیے جانےوالے فلسطینیوں میں بھی شامل ہیں۔
دوسری جانب حماس اور دیگر جماعتوں نے ابراہیم ابو سالم کی گرفتاری کو فلسطینی اتھارٹی کی سیاسی انتقام کی بدترین کوشش قرار دیا ہے۔