اردن کی وزارت خارجہ کے سرکاری ترجمان محمد الکاید نے منگل کے روز اسرائیلی اور فلسطینی رہنماؤں کی عمان میں ملاقات کی میزبانی کا اعلان کیا ہے۔ انہوں نے کہا کہ یہ ملاقات بھی فریقین کے مابین مذاکرات کے آغاز کے لیے مثبت ماحول پیدا کرنے کی کوششوں کا ایک حصہ ہے۔
الکاید نے اردنی ذرائع ابلاغ میں شائع اپنے بیان میں کہا کہ وزیر خارجہ ناصر جودہ اس ملاقات کی میزبانی کرینگے اور اس دوران گروپ چار سے تعلق رکھنے والے عالمی رہنما بھی موجود ہونگے۔
اس دوران گروپ چار کے مندوبین کی دونوں فریقوں کے رہنماؤں سے علیحدہ علیحدہ ملاقاتوں کا سلسلہ بھی جاری رہے گا اور براہ راست مذاکرات کے آغاز اور دونوں ملکوں کے مابین قیام امن کے مسائل پر گفتگو کی جائے گی۔ اس دوران فلسطین اور اسرائیل کو گروپ چار کو دی گئی سنہ 2012 کے آخر تک تمام مسائل کے حل کی ڈیڈ لائن سے پہلے اپنے مسائل نمٹانےکا کہا جائے گا۔
اردنی ترجمان کے مطابق وزیر خارجہ ناصر جودہ نے گزشتہ کچھدنوں کے دوران فلسطینی اور اسرائیلی قائدین کے ساتھ رابطے اور مشاورت جاری رکھی۔اس دوران ناصر جودہ نے اقوام متحدہ کے سیکرٹری جنرل بان کی مون، امریکی وزیر خارجہ ھیلری کلنٹن، روسی وزیر خارجہ سیرگی لاروف اور یورپی خارجہ اور دفاعی امور کےکمشنر ایسٹن، گروپ چار کے مندوب ٹونی بلیئر سے بھی رابطے کیے۔
مزید برآں عرب لیگ کے سیکرٹری جنرل ڈاکٹر نبیل عربی، قطر کے وزیر خارجہ اور دیگر وزراء، عرب پیس اینی شی ایٹو کے سربراہ شیخ حمد بن جاسماور متعدد عرب وزراء خارجہ سے بھی مشاورت جاری رہی۔ اردنی وزیر خارجہ کی انتھک کوششوں کے بعد فلسطین اور اسرائیل کے مابین مذاکرات کی بحالی کے لیے سازگار ماحول پیدا ہو گیا جس میں اردن کے کنگ کی مساعی بھی قابل قدر رہی ہیں۔