رپورٹ کے مطابق فلسطینی وزارت صحت کی جانب سے جاری کردہ ایک بیان میں کہا گیا ہے کہ مغربی کنارے کے وسطی شہر رام اللہ میں الامعری پناہ گزین کیمپ سے البیرہ شہر تک فلسطینیوں اور اسرائیلی فوجیوں کےدرمیان جھڑپیں ہوئیں جن میں 28 فلسطینیوں کے زخمی ہونے کی تصدیق کی گئی ہے۔
وزارت صحت کے بیان میں بتایا گیا ہے کہ اسرائیلی فوج کی ریاستی دہشت گردی کے نتیجے میں بعض فلسطینیوں کو گہرے زخم آئے ہیں۔ رام اللہ کے ایک اسپتال میں لائے گئے ایک زخمی کے سرمیں گولی لگی ہے جس کی حالت نازک بتائی جاتی ہے۔
البیرہ سے مقامی فلسطینی ذرائع نے بتایا کہ صہیونی فوجیوں نے تلاشی کے دوران ایمن ابو عرب اور اس کے بیٹے سمیت تین فلسطینیوں کو حراست میں لے لیا۔ ایمن کے گھر پرچھاپے کے بعد اس کے مکان کو فوجی چھاؤنی میں تبدیل کردیا گیا تھا۔
اور مغربی کنارے کے شمالی شہر جنین میں العرقہ کے مقام پر فلسطینیوں اورقابض اسرائیلی فورسز کے درمین جھڑپیں ہوئیں۔ یہ جھڑپیں دو فلسطینی بچوں کی شہادت کے خلاف فلسطینیوں کا رد عمل ہے۔
خیال رہے کہ گذشتہ روز اسرائیلی ریاستی دہشت گردی کے نتیجے میں جنین میں دو فلسطینی بچے جام شہادت نوش کرگئے تھے۔ اسرائیلی فوج کی ریاستی دہشت گردی کے رد عمل میں فلسطینی شہریوں کی جانب سے سخت احتجاج کیا گیا ہے۔