(فلسطین نیوز۔مرکز اطلاعات) اسرائیلی فوج نے ریاستی دہشت گردی میں ایک اور فلسطینی نوجوان کو گولیاں مار کر شہید کردیا۔ اسرائیلی فوجیوں نے دعویٰ کیا ہے کہ فلسطینی شہری کو اس وقت گولیوں کا نشانہ بنایا گیا جب وہ یہودی فوجیوں کو اپنی کار تلے کلچنے کی کوشش کررہا تھا تاہم فلسطینی ذرائع نے صہیونی فوج کے اس دعوے کو بے بنیاد قرار دے کر مسترد کر دیا ہے۔
عینی شاہدین نے بتایا کہ ہفتے کی شام مغربی کنارے کے شمالی شہر نابلس میں حوارہ چوکی کے قریب اسرائیلی فوجیوں نے ایک کار پرفائرنگ کی جس کے نتیجے میں کار میں موجود ایک فلسطینی شہری شہید ہوگیا۔
ایک دوسرے عینی شاہد نے بتایا کہ اسرائیلی فوجیوں کی فائرنگ سے ایک فلسطینی نوجوان شدید زخمی ہوا۔ زخمی فلسطینی نوجوان کو ہلال احمر فلسطین کی ایک ایمبولینس کی مدد سے اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گیا۔
فلسطینی وزارت صحت نے ایک بیان میں اسرائیلی فوج کی فائرنگ سے شہید ہونے والے فلسطینی شہری کی شناخت 56 سالہ ماہر حسنی الجابی کے نام سے کی ہے۔
عینی شاہدین کا کہنا ہے کہ فلسطینی شہری پراسرائیلی فوجیوں پر گاڑی چڑھانے کا الزام قطعی بے بنیاد ہے۔ گاڑی کی ٹکر سے کوئی یہودی آباد کار زخمی نہیں ہوا ہے۔