(فلسطین نیوز۔مرکز اطلاعات) قابض اسرائیلی فوج نے ایک چھاپہ مار کارروائی کے دوران مغربی کنارے کے جنوبی شہر الخلیل سے اسلامی تحریک مزاحمت ‘‘حماس’’ کے ایک اہم رہنما ڈاکٹر امجد الحموری کو حراست میں لے لیا ہے۔
حماس کے اسیر رہنما الحموری کی اہلیہ اسماء الشرباتی نے بتایا کہ اتوار کے روز اسرائیلی فوجیوں نے وسطی الخلیل کی عین سارہ کالونی میں واقع ان کے گھر پرچھاپہ مارا۔ گھر میں توڑپھوڑ کی اور اس کے بعد اس کے شوہر کو ایک گاڑی میں ڈال کر نامعلوم مقام کی طرف لے گئے ہیں۔خیال رہے کہ ڈاکٹر الحموری نے سنہ 2007 ء میں فلسطین میں ہونے والے پارلیمانی انتخابات میں حماس کے پارلیمانی بلاک اصلاح وتبدیلی کی ٹکٹ پر انتخابات میں حصہ لیا تھا مگر وہ کامیاب نہیں ہوسکے۔ وہ ماضی میں بھی متعدد مرتبہ اسرائیل کی جیلوں میں پابند سلاسل رہ چکے ہیں۔
الحموری پیشے کے اعتبار سے ڈینٹل ڈاکٹر ہیں اور انہوں نے اردن کی سائنس وٹیکنالوجی یونیورسٹی سے ایم بی بی ایس کی ڈگری حاصل کر رکھی ہے۔