رپورٹ میں بتایا گیا ہے کہ فلسطینی نوجوان نے حوارہ چوکی کے قریب فوجیوں پر فدائی حملے کی کوشش کی تھی تاہم وہاں پر موجود فوجیوں نے یہ کارروائی ناکام بناتے ہوئے حملہ آور کو کارروائی سے قبل ہی گولیاں مار دیں جس کے نتیجے میں اس کی موت واقع ہوگئی۔
دوسری جانب فلسطینی وزارت صحت نے اسرائیلی فوجیوں کےحملے میں ایک فلسطینی نوجوان کی شہادت کی تصدیق کی ہے اور بتایا ہے کہ شہید فلسطینی کے جسم میں کئی گولیاں پیوست ہوئیں جو اس کے لیے جان لیوا ثابت ہوئی ہیں۔
عینی شاہدین نے بتایا کہ اسرائیلی فوجیوں نے ایک فلسطینی نوجوان پر اس وقت فائرنگ کی جب وہ بلاک فیکٹری کے قریب سڑک کے کنارے کھڑا تھا۔ عینی شاہدین نے بتایا کہ فلسطینی نوجوان کو بلا جواز گولیاں ماری گئیں۔ اسرائیلی فوجیوں نے جب اس پر فائرنگ کی تو وہ فوجی چوکی سے کئی میٹر دور کھڑا تھا۔
مذکورہ فلسطینی نوجوان کی شہادت کے بعد یکم اکتوبرسے جاری تحریک انتفاضہ قدس کے دوران صیہونی فوجیوں کے ہاتھوں شہید ہونے والے فلسطینیوں کی تعداد ایک سو چھبیس ہوگئی ہے۔
شہید ہونے والوں میں چھبیس بچے بھی شامل ہیں۔
دوسری جانب قلندیا کیمپ میں صیہونی فوجیوں اور فلسطینیوں کے درمیان دوسری بار جھڑپوں کی خبریں موصول ہوئی ہیں۔ ان جھڑپوں میں درجنوں فلسطینی زخمی ہوئے ہیں اور متعدد کو صیہونی فوجی اغو کرکے اپنے ساتھ لے گئے ہیں۔