فلسطین کے ممتاز سیاسی رہ نما اور آزادی فلسطین کے ایک سرکردہ لیڈر شیخ رائد صلاح برطانیہ کے طویل دورے کے بعد آج پیر کو وطن واپس پہنچ رہے ہیں۔ ان کے استقبال کے لیے مقبوضہ فلسطین کی نمائندہ تنظیم اسلامی تحریک نے والہانہ استقبال کی تیاریاں کی ہیں۔
خیال رہے کہ شیخ رائد صلاح گذشتہ برس جولائی میں برطانیہ میں فلسطینی کمیونٹی کی دعوت پرگئے تھے تاہم صہیونی دباؤ کے تحت برطانوی پولیس نے انہیں حراست میں لے لیا تھا۔ بعد ازاں انہیں رہا کردیا گیا تاہم انہوں نے برطانوی وزارت داخلہ اور پولیس کےخلاف لندن کی ایک عدالت میں مقدمہ قائم کردیا تھا۔ برطانوی پولیس کےخلاف اپیل میں ان کے حق میں فیصلہ کیا گیا جس کے بعد وہ اپنی مرضی سے فلسطین واپس ہو رہے ہیں۔
مرکزاطلاعات فلسطین کے مطابق اسلامی تحریک کی جانب سے جاری ایک بیان میں بتایا گیا ہے کہ شیخ رائد صلاح پیر کے روز آج شام گرنیچ کے معیاری وقت کے مطابق انیس بج کربیس منٹ پراللد ہوائی اڈے پراتریں گے، جس کے بعد انہیں ایک جلوس کی شکل میں مقبوضہ فلسطین کے شہرناصر لایا جائے گا۔
بیان میں کہا گیا ہے کہ اسلامی تحریک اور دیگرمذہبی، سیاسی اور سماجی تنظیموں نے شیخ رائد کے آبائی شہر ام الفحم میں ایک بڑے استقبالیہ جلوس کا بھی اہتمام کیا ہے۔ شیخ رائد صلاح اس استقبالیہ جلسے سے خطاب بھی کریں گے۔
بیان کے مطابق پرسوں بدھ اٹھارہ اپریل کو ام الفحم کی فلسطینی بلدیہ کے زیراہتما شیخ رائد صلاح کے اعزازمیں ایک استقبالیہ تقریب ہوگی۔ تقریب میں شیخ رائد صلاح کے علاوہ اسلامی تحریک کے رہ نما شیخ محمد زیدان، جماعت کے نائب صدر شیخ کمال خطیب اور دیگر رہ نما خطاب کریں گے۔
بشکریہ: مرکز اطلاعات فلسطین