یہودی آباد کار عرصے سے مغربی کنارے کے شہر نابلس میں واقع مسلمانوں کے انتہائی مقدس مقام جلیل القدر پیغمبر حضرت یوسف علیہ السلام کی قبر مبارک کی بے حرمتی کا سلسلہ جاری رکھے ہوئے ہیں۔
حال ہی میں سیکڑوں یہودیوں نے ایک بار پھر مزار مبارک میں گھس کر موسیقی سے بھرپور تلمودی عبادات ادا کیں۔ مقامی ذرائع نے بتایا کہ اسرائیلی فوج کی بڑی تعداد کی موجودگی میں غاصب یہودیوں کے گروہ بسوں پر سوار ہوکر علاقے میں داخل ہوئے۔ عینی شاہدین نے بتایا کہ اسرائیلی فوجیوں نے مختلف قسم کا آٹو میٹک اسلحہ پکڑ رکھا تھا۔
اسرائیلی ریڈیو کے مطابق اس دوران فلسطینی اتھارٹی کی سکیورٹی فورسز نے بھی غاصب یہودیوں کا پھرپور ساتھ دیا اور ان کی آمد سے قبل ہی علاقہ چھوڑ دیا۔ یاد رہے کہ غاصب آباد کار آکثر و بیشتر جلیل القدر پیغمبر کی قبر مبارک پر دھاوا بولتے رہتے ہیں اور یہاں پر رقص و سرور اور دیگر واہیات حرکتوں پر مشتمل رسومات کی ادائیگی کرتے ہیں۔ وہ پیغمبر جن کے قصے کو احسن القصص قرار دیا گیا اور جن کے تذکرے میں قرآن کی پوری ایک سورت نازل کی گئی، کے مزار کی بے حرمتی پر فلسطینیوں میں سخت اشتعال پایا جاتا ہے۔ یہی وجہ ہے کہ غاصب یہودیوں کو مزار میں داخل ہونے سے روکنے کی کوششوں کے دوران اب تک متعدد فلسطینی جام شہادت نوش کر چکے ہیں۔
بشکریہ: مرکز اطلاعات فلسطین