(روزنامہ قدس ۔آن لائن خبر رساں ادارہ) فلسطینی مزاحمتی تحریک حماس نے جامع انتخابات کے اعلان کا خیر مقدم کرتے ہوئے کہا ہے کہ قومی وحدت اور سیاسی شراکت اقتدار کے فارمولے پرعمل درآمد وقت کی ضرورت ہے۔
مقبوضہ فلسطین میں اسرائیلی مظالم کے خلاف برسرپیکار اسلامی تحریک مزاحمت ‘حماس’ کے سیاسی شعبے کے سینیر رکن ڈاکٹر خلیل الحیہ نے کہا ہے کہ ان کی جماعت ملک میں جامع انتخابات کے اعلان کا خیرمقدم کرتی ہے تاہم انتخابات کے انعقاد کے حوالے سے حماس کا موقف واضح ہے۔
انہوں نے فلسطین میں سیاسی نظام کی تشکیل نو کی ضرورت پر زور دیتے ہوئے کہا کہ حماس فلسطین میں صدارتی، پارلیمانی اور بلدیاتی انتتخابات کےانعقاد کا خیر مقدم کرتی ہے اور انہیں کامیاب بنانے کے لیے ہر ممکن کوشش کرے گی۔انہوں نے مزید کہا کہ قومی مصالحتی ویژن پرعمل درآمد کرتے ہوئے قومی وحدت اور سیاسی شراکت اقتدار کے فارمولے پرعمل درآمد وقت کی ضرورت ہے۔