اسرائیلی فوج نے تصدیق کی ہے کہ حماس کے ساتھ جھڑپ میں غزہ کے شمالی علاقے میں2 صیہونی فوجی مارے گئے جبکہ لبنان کے جنوبی علاقے میں حزب اللہ کے ساتھ لڑائی میں زخمی ایک میجر جنرل بھی دم توڑ گیا۔
غیر قانونی صیہونی ریاست اسرائیل کے میڈیا نے تصدیق کی ہے کہ غزہ میں مارے گئے دونوں اہلکاروں کی شناخت 20 سالہ اوفیر برکووچ اور 19 سالہ الیشائی ینگ کے ناموں سے ہوئی ہے۔یہ دونوں سارجنٹ اسٹاف کا حصہ تھے اور غزہ میں حماس کے ساتھ دوبدو جنگ کرنے والی بڑی فوج کے ایک بریگیڈ میں شامل تھے جو ملٹری آپریشن کے دوران ہلاک ہوئے۔اس طرح غزہ میں حماس کے ساتھ برّی جنگ میں ہلاک ہونے والے اسرائیلی فوجیوں کی تعداد 357 ہوگئی۔ جن میں یرغمالیوں کو بچانے کے مشن کے ایک پولیس افسر اور وزارت دفاع کا ایک کنٹریکٹر بھی شامل ہے۔اسرائیلی فوج کے ایک اور بیان میں تصدیق کی گئی ہے کہ گزشتہ ہفتے لبنان کے جنوبی علاقے میں حزب اللہ کے ساتھ جھڑپ کے دوران زخمی ہونے والے 38 سالہ میجر جنرل ایشائی نیتنیل گرین بام زخموں کی تاب نہ لاتے ہوئے چل بسا۔