جاپان نے جنگ زدہ فلسطینی شہر جاپان کی تعمیرنو اور بحالی کے سلسلے میں دو ملین ڈالرکی امداد کا اعلان کیا ہے۔ یہ امداد فلسطینی پناہ گزینوں کے امورسے متعلق اقوام متحدہ کی ریلیف ایجنسی’’اونروا‘‘ کے ذریعے فراہم کی جائے گی۔
مرکزاطلاعات فلسطین کے مطابق جاپان کی جانب سے غزہ کے لیے امداد ’’اونروا‘‘ کی اپیل پر دی جا رہی ہے۔ اقوام متحدہ کی ریلیف ایجنسی نے نومبر کے وسط میں غزہ کی پٹی پراسرائیلی فوج کی جارحیت کے بعد شہرمیں ہونے والی تباہی کے تناظرمیں عالمی برداری سے مدد کی درخواست کی تھی۔ جاپان سمیت کئی یورپی ملکوں نے بھی اونروا کے ذریعے محصور شہرکی تعمیرنو میں مدد فراہم کرنے کا وعدہ کیا ہے۔
اونروا کی جانب سے جاری ایک بیان میں بتایا گیا ہے کہ جاپان سے ملنے والی امداد جنگ سے متاثرہ فلسطینیوں کے لیے ضروری اشیاء کی فراہمی، بستروں اور کمبل کی خریداری کے علاوہ تباہ حال عمارتوں کی تعمیرات پرخرچ کی جائے گی۔
بیان میں کہا گیا ہے کہ غزہ پرآٹھ روزہ اسرائیلی حملوں کے نتیجے میں شہرمیں موجود مہاجرین کے کیمپ بری طرح متاثر ہوئے ہیں۔ بالخصوص غزہ کے ساحلی علاقوں میں قائم پناہ گزین کیمپوں میں ہنگامی امداد کی فوری ضرورت ہے۔ اسرائیلی فوج کے حملوں کے نتیجے میں مہاجرکیمپوں کا انفراسٹرکچر، اسکول، اسپتال اور سیوریج کا نظام بھی تباہ ہوچکا ہے، جن کی بحالی کے لیے فوری امدادی اقدامات کی ضرورت ہے۔ اقوام متحدہ کی ریلیف ایجنسی نے عالمی برادری سے زبوں حالی کا شکار غزہ کے شہریوں کو مزید امداد فراہم کرنے کی بھی اپیل کی ہے۔
خیال رہے کہ نومبر کے وسط میں غزہ کی پٹی پراسرائیلی حملوں میں کم سے کم 2 ارب ڈالرز کا نقصان ہوا ہے۔ شہرکی تعمیر نوکے لیے امدادی اداروں نے عالمی برادری سے جنگی بنیادوں پر مدد کی بھی اپیلیں کی ہیں۔
بشکریہ:مرکز اطلاعات فلسطین