فلسطین میں عیسائی عبادت گاہوں کے تحفظ کی ذمہ دار چرچ کونسل نے انتہا پسند یہودیوں کے ہاتھوں بیت المقدس کےایک چرچ کی بے حرمتی کی شدید الفاظ میں مذمت کرتے ہوئے اسے آسمانی مذاہب کی تعلیمات کی صریح توہین قراردیا ہے۔
مرکزاطلاعات فلسطین کے مطابق چرچ کونسل کی جانب سے بدھ کے روز جاری ایک بیان میں کہا گیا ہے کہ عبادت گاہوں کوحملوں اور انتقام کا نشانہ بنانا غیرانسانی اور غیراخلاقی اقدام ہے۔ جو انتہا پسند یہودی بیت المقدس میں دیر
الفرنسیسکین چرچ کی بے حرمتی اور اس میں نسل پرستانہ عبارات لکھنے میں ملوث ہیں، وہ انسانیت سے عاری لوگ ہیں۔ چرچ کونسل ان انتہا پسندوں کے اقدام کی شدید مذمت کرتے ہوئے صہیونی حکومت سے مطالبہ کرتی ہے کہ وہ فلسطین میں عیسائیوں اور مسلمانوں کی عبادت گاہوں کو محفوظ بنانے کے لیے ٹھوس اقدامات کرے۔
کونسل کے بیان میں کہا گیا ہے کہ پچھلے ایک ماہ کے دوران دیر الفرنسیسکین چرچ کی بیرونی دیواروں پر انتہا پسند یہودیوں کے نازیبا جملوں کی چاکنگ مسلسل ہو رہی ہے۔ چرچوں کی توہین حضرت مسیح علیہ السلام اور خدائے بزگ وبرتر کی توہین کے مترادف ہے۔
خیال رہے کہ فلسطین میں پچھلے ایک سال سے انتہا پسند یہودیوں نے مسلمانوں اور عیسائیوں کی عبادت گاہوں پرحملوں اور ان کی توہین کی ایک شرانگیز مہم شروع کر رکھی ہے۔ اس مہم کے تحت یہ انتہا پسند رات کی تاریکی میں عبادت گاہوں کی بیرونی دیواروں پر یہودیت کے حق میں اور اسلام اور عیسائیت کےخلاف نعرے درج کرنے کے بعد نیچے یہ عبارت لکھتے ہیں کہ ‘‘یہ آپ لوگوں سے انتقام ہے’’۔
بشکریہ: مرکز اطلاعات فلسطین